खोज

बुटवल ।

नेपाल उद्योग परिसंघ अन्तर्गतको युवा उद्यमी मञ्च लुम्बिनीले आफ्नो वार्षिक कार्ययोजना बैठक बुटवलमा सम्पन्न गरेको छ। बैठकमा मञ्चका पदाधिकारी, सदस्य तथा आमन्त्रित वक्ताहरूको सक्रिय सहभागिता रह्यो।

बैठकको प्रारम्भमा शिवसुन्दर पोखरेलले मञ्चको विधान प्रस्तुत गरे भने अध्यक्ष राजन कसजुले आगामी वर्षका कार्यक्रमहरू र गतिविधिहरू समेटिएको रणनीतिक कार्यपात्रो प्रस्तुत गरे।

कार्यक्रमको शिक्षण सेग्मेन्टमा विकाश पाण्डेले उद्यमशीलता विषयमा संक्षिप्त तर प्रभावशाली प्रस्तुति दिए। उनले युवाले लिनुपर्ने दृष्टिकोण र उद्यममा अपनाउनु पर्ने सोचबारे आफ्ना अनुभवहरू बाँडे। त्यस्तै सुरज उप्रेतीले विकास र विस्तार सम्बन्धी योजनाहरू प्रस्तुत गर्दै क्षेत्रीय उद्यममा युवाको भूमिकाबारे धारणा राखे। उनले मञ्चको वर्तमान वित्तीय अवस्थाबारे जानकारी दिँदै पारदर्शिता र स्रोत परिचालनमा थप ध्यान केन्द्रित गर्ने बताए।

अभिषेक पाठकले सदस्यता अद्यावधिक सम्बन्धी प्रस्तुति दिंदै, सदस्य विस्तार अभियानको वर्तमान स्थिति र भावी योजना प्रस्तुत गरे।

कार्यक्रममा नेपाल उद्योग परिसंघ लुम्बिनी प्रदेशका उपाध्यक्ष बाबुराम बोहोराले युवा उद्यमीहरूलाई अझ सशक्त र सङ्गठित भएर अघि बढ्न प्रेरणा प्रदान गरे।

बैठकले युवा उद्यमशीलता प्रवर्द्धन, नवप्रवर्तनमा आधारित परियोजना सञ्चालन, नेटवर्क विस्तार, तथा नीतिनिर्मातासँग सहकार्य बढाउने निर्णयसमेत गरेको छ।