खोज

नेपालगञ्ज, १३ जेठ ।

बाँकेको राप्ती सोनारी गाउँपालिकामा नयाँ व्यवसाय दर्ता तथा व्यवसाय सूचिकृतको संख्या ह्वात्तै बढेको छ । पुरानो व्यवसाय नवीकरण संख्याको तुलनामा नयाँ व्यवसाय दर्ता तथा व्यवसाय सूचिकृत हुनेको संख्या ह्वात्तै बढेकोे हो ।

राप्ती सोनारी गाउँपालिका राजश्व शाखा प्रमुख मिना कुमारी श्रेष्ठका अनुसार यस वर्ष एक सय ७७ वटा व्यवसाय सूचिकृत भएका छन् भने ८२ वटा नयाँ व्यवसाय दर्ता भएका छन् । व्यवसाय नवीकरणको संख्या ३९ वटा रहेको छ । सबै भन्दा धेरै राप्ती सोनारी ८ नम्बर वडामा ७९ वटा व्यवसाय सूचिकृत भएका छन् भने सबैभन्दा थोरै २ नम्बर वडामा दुई वटा व्यवसाय रहेको छ । यस्तै नयाँ व्यवसाय दर्ता गराउने सबै भन्दा धेरै राप्ती सोनारी ९ नम्बर वडामा २० वटा रहेका छन् भने सबैभन्दा थोरै राप्ती सोनारी ७ मा एउटा मात्र रहेको छ ।

गाउँपालिकाको वार्षिक स्वीकृत कार्यक्रम अन्तर्गत व्यवसाय दर्ता नवीकरण तथा सूचिकृत सम्बन्धी कार्यक्रम सञ्चालन गर्दा पालिका भित्र रहेका व्यवसायीलाई व्यवसाय दर्ता गरेर मात्र सञ्चालन गर्नुपर्ने र प्रत्येक वर्ष नवीकरण गर्नुपर्ने कुराको जानकारी र चेतना हुनुका साथै परिमाणात्मक उपलब्धि भएको उनले बताइन् । उनले भनिन्, ‘यसअघि यहाँका सबै व्यवसायहरु नेपालगञ्ज उद्योग वाणिज्य संघ र घरेलु तथा साना उद्योग कार्यालय बाँकेमा दर्ता हुँदै आएका थिए ।

पालिकाले सूचिकृत कार्यक्रम थालेपछि पालिकामा नै नयाँ व्यवसाय दर्ता तथा सूचिकृत भएका हुन् ।’ उद्योग वाणिज्य संघ र घरेलु तथा साना उद्योग कार्यालयमा यसअघि दर्ता भइसकेका एक सय ७७ वटा व्यवसायहरु अहिले पालिकामा सूचिकृत हुन आएको उनले बताइन् । राप्तिसोनारी गाउँपलिका अन्तर्गत सबै वडाहरुमा सञ्चालित व्यवसायको यथार्थ विवरण प्राप्त गर्ने उद्देश्यले गाउँपालिका भरी नै प्रत्येक वडा कार्यालयमा गत चैत २६ गतेदेखि व्यवसाय सूचिकृत, दर्ता तथा नवीकरण शिविर सञ्चालन गरिएको थियो ।

व्यवसायीहरुले वडामा सञ्चालित शिविरमा सूचिकृत, नयाँ दर्ता तथा नवीकरण गराएका थिए । व्यवसाय सूचिकृत, दर्ता तथा नवीकरणबाट यस चालु आर्थिक वर्ष २०८१÷०८२ मा एक लाख ६४ हजार ९ सय राजश्व संकलन भएको राजश्व शाखा प्रमुख श्रेष्ठले जानकारी दिइन् । प्रत्येक वडा कर्यालयमा व्यवसाय सूचिकृत, दर्ता, तथा नवीकरण शिविर सञ्चालन भएर ठुलो राहत भएको व्यवसायीहरुले बताएका छन् । राप्ती सोनारी ३ भवनियापुर स्थित अर्पण होटल तथा किराना पसल सञ्चालन गर्दै आएका महेश रत्गैयाँले भने, ‘यही दर्ताको कामले टाढाको गाउँबाट पालिकाको कार्यालय अगैया जाँदा अटो भाडा करिव पाँच सय बढी खर्च हुने थियो, वडामै शिविर सञ्चालन भएर पैसा र समयको बचत भयो ।’ कुनै बेला सुगम जिल्लाको दुर्गम ठाउँको रुपमा परिचित बाँकेको राप्ती सोनारीमा हुलाकी रोड तथा राप्ती नदीमा पुल निर्माण भएपछि साना उद्योग तथा व्यवसाय फस्टाउँदै गएको देखिन्छ ।