खोज

लुम्बिनी  ।

लुम्बिनी सांस्कृतिक नगरपालिका- ११, जितवापुरमा सञ्चालन भइरहेको विष्णु महायज्ञमाथि जेठ १० गते शनिवार राती भएको साङ्घातिक आक्रमणप्रति विश्व हिन्दु परिषद् नेपालले गहिरो दुःख, चिन्ता र आक्रोश व्यक्त गर्दै जिल्ला प्रशासन कार्यालय रुपन्देहीमार्फत विरोध जनाएको छ।

विश्व हिन्दु परिषद् नेपाल, रुपन्देहीले प्रमुख जिल्ला अधिकारी वासुदेव घिमिरेलाई जेठ १२ गते सोमबार बुझाएको ज्ञापन पत्रमार्फत वैदिक महायज्ञमा भएको आक्रमणलाई आपराधिक कुकृत्य र धार्मिक सहिष्णुतामाथिको गम्भीर प्रहारको रूपमा लिँदै कडा शब्दमा निन्दा गरेको छ।
विश्व हिन्दु परिषद् नेपाल, रुपन्देहीका अध्यक्ष गोपाल उपाध्यायले त्यस्ता घटनाहरू सामाजिक सद्भाव र धार्मिक सौहार्दमा खलल पुर्‍याउने षड्यन्त्र भएको बताए। उनले भने, ʼत्यस्ता धार्मिक कार्यक्रमहरूको सुरक्षाका लागि ठोस सुरक्षा नीति अवलम्बन गरी कडाइका साथ लागू गर्नुपर्दछ ।ʼ

घटनास्थलबाट हतियारसहित रङ्गेहात पक्राउ परेका लुम्बिनी सांस्कृतिक नगरपालिका–५ बस्ने २७ वर्षीय कलामुद्दीन मुसलमान र २६ वर्षीय रोशनअली फकीर लगायत घटनामा संलग्न अन्य फरार व्यक्तिहरूको तत्काल पहिचान गरी आवश्यक कारबाही गर्न पनि जोडदार आग्रह गरिएको छ।

विश्व हिन्दु परिषद् नेपाल, रुपन्देहीका अध्यक्ष गोपाल उपाध्याय र विभागाध्यक्ष दिपक प्रसाद लोधद्वारा हस्ताक्षरित विज्ञप्तिले प्रहरी प्रशासनद्वारा तत्काल उठाइएको कदमको प्रशंसा गर्दै पीडितहरूलाई तत्काल उपचार, राहत, क्षतिपूर्ति, तथा न्यायको सुनिश्चितता गर्नुपर्ने माग अघि सारेको छ।

“धर्मो रक्षति रक्षितः” भन्ने वैदिक मूल मन्त्र उद्धृत गर्दै परिषद्ले धर्म, संस्कृति, सामाजिक तथा शान्तिमा विश्वास राख्ने सम्पूर्ण नेपाली नागरिकको भावनाको आदर गर्दै प्रशासनले घटनालाई गम्भीर रूपमा लिएर आवश्यक कानुनी कारबाहीको प्रक्रिया अघि बढ्ने विश्वास व्यक्त गरेको छ।