खोज

काठमाडौँ ।

 गृहमन्त्री रमेश लेखकको राजीनामा र उच्चस्तरीय छानबिन आयोग गठनको माग गर्दै प्रमुख प्रतिपक्षी दलहरूको अवरोधका कारण प्रतिनिधिसभा बैठक स्थगित भएपछि सभामुख देवराज घिमिरेले दलका प्रमुख सचेतकहरूसँग संवाद थालेका छन्।

मंगलबार दिउँसो नयाँ बानेश्वरस्थित संसद भवनमा भइरहेको छलफलमा संसदमा प्रतिनिधित्व गर्ने दलका प्रमुख सचेतक र सचेतकहरू सहभागी छन्। विपक्षी दलहरू — विशेषतः नेकपा (माओवादी केन्द्र) र राष्ट्रिय स्वतन्त्र पार्टी — ले गृहमन्त्रीको नामसमेत जोडिएको भिजिट भिसा प्रकरणको गम्भीरता औंल्याउँदै राजीनामा र छानबिन आयोग गठनबिनाको संसद सञ्चालन नहुने अडान लिएका छन्।

यता, सत्तारूढ नेकपा (एमाले) र नेपाली कांग्रेस भने गृहमन्त्री लेखकलाई सदनमा बोल्न दिनुपर्ने मागमा उभिएका छन्। तर सत्तापक्ष र प्रतिपक्षबीच सम्झौता खोज्ने प्रयास भए पनि सहमति बन्न सकेको छैन।

यसअघि पनि यही विषयमा संसद अवरुद्ध बनेपछि सभामुखले आधा घण्टाका लागि बैठक स्थगित गरेका थिए। तर जारी राजनीतिक किचलोका कारण साढे दुई बजेका लागि तय भएको बैठकसमेत सुरु हुन नसकेको संसद सचिवालयले जनाएको छ।

प्रतिनिधिसभाको अवरोध हटाउन सभामुखको पहल जारी रहे पनि भिजिट भिसा प्रकरण राजनीतिक संकटको रूप लिँदै गएको देखिन्छ।