खोज

काठमाडौँ ।

नेपाल समाजवादी पार्टी (नेसपा) का सह–अध्यक्ष गंगानारायण श्रेष्ठ सोमबार ललितपुरको ग्वार्कोमा आयोजित एकता सभामा नेकपा (माओवादी केन्द्र) मा फर्किएका छन्। दुई पार्टीबीच भएको ५ बुँदे सहमतिअनुसार श्रेष्ठलाई माओवादीमा सचिवको जिम्मेवारी दिइने भएको छ।

लामो समय वामपन्थी राजनीतिमा सक्रिय श्रेष्ठले २०७२ सालमा माओवादी पार्टी छोडेका थिए। त्यसपछि उनले डा. बाबुराम भट्टराईको नयाँ शक्ति अभियानमा काम गरेका थिए। नयाँ शक्ति नेपालको निर्वाचनमा पराजयपछि यसले संघीय समाजवादी पार्टीसँग एकता गरी जनता समाजवादी पार्टी (जसपा) गठन गर्यो।

२०७९ मा भट्टराई नेतृत्वमा नेपाल समाजवादी पार्टी गठन हुँदा श्रेष्ठ सह–अध्यक्ष बनेका थिए। २०७९ निर्वाचनअघि नै माओवादीसँग एकताको पहल गर्दै आएका श्रेष्ठको नेतृत्वमा नेसपाले माओवादीसँग वार्ता गरी एकता प्रक्रियामा अघि बढेको थियो।

तर, बाबुराम भट्टराई अन्तिम समयमा एकता प्रक्रिया छोडेपछि श्रेष्ठले अर्का अध्यक्ष महिन्द्र राय यादवलाई साथ दिँदै पार्टी पुनर्गठन गरे। यादवले लामो समय एकता प्रक्रिया टारेपछि सोमबार श्रेष्ठको नेतृत्वमा पुनः नेसपा पुनर्गठन गरी माओवादीसँग एकता घोषणा गरिएको हो।श्रेष्ठले एकताबाट पार्टीको नाम, झण्डा, वैचारिक विषयहरू महाधिवेशनले टुङ्ग्याउने गरी सहमति भएको बताए।

गंगानारायण श्रेष्ठको परिचय
श्रेष्ठ सिन्धुली जिल्ला साविक सिद्धेश्वर गाविस (हाल कमलामाई नगरपालिका–५) मा २०२६ साल फागुन १० गते जन्मिएका हुन्। जनयुद्धकालमा ‘प्रभात’ उपनामले चिनिएका श्रेष्ठ त्रिभुवन विश्वविद्यालयबाट सामाजशास्त्र र नेपाली विषयमा स्नातकोत्तर तहसम्म अध्ययन गरिसकेका छन्।

उनले २०४३ सालमा अनेरास्ववियुबाट राजनीति सुरु गरे र २०४५ सालमा नेकपा (मसाल) मा प्रवेश गरे। २०५२ सालमा अनेरास्ववियू क्रान्तिकारीको केन्द्रीय महासचिव भएका श्रेष्ठ २०५३ सालमा पक्राउ परेर पाँच वर्ष जेल सजाय भोगेका थिए।

श्रेष्ठ २०६० सालमा नेकपा (माओवादी)को वैकल्पिक केन्द्रीय सदस्य, २०६३ सालदेखि २०६४ सम्म अन्तरिम व्यवस्थापिका सदस्य र २०७१ मा माओवादी पोलिटब्युरो सदस्य बने। त्यसपछि नयाँ शक्ति पार्टी, जनता समाजवादी पार्टी र नेपाल समाजवादी पार्टीमा सक्रिय रहेका उनले लामो राजनीतिक अनुभव संचित गरेका छन्।

सोमबार भएको एकता कार्यक्रममा श्रेष्ठसहित १७ केन्द्रीय कार्यकारिणी सदस्य र करिब १०० केन्द्रीय सदस्य माओवादी केन्द्रमा समाहित भएको दाबी गरिएको छ। माओवादीले एकता प्रक्रियामा सहभागी नेताहरुलाई पूर्वपार्टीमा रहेका भूमिकाअनुसार जिम्मेवारी दिने निर्णय गरिसकेको छ।