खोज

 काठमाडौं, १२ जेठ।

नेपाली कांग्रेसको पदाधिकारी बैठकमा गृहमन्त्री रमेश लेखकको राजीनामाको माग गर्ने नेताहरूसँग स्पष्टीकरण माग्नुपर्ने विषय उठान भएको छ। सभापति शेरबहादुर देउवाको निवास बुढानीलकण्ठमा बसेको बैठकमा भिजिट भिसा प्रकरणमा गृहमन्त्री लेखकको संलग्नताबारे छलफल भएको थियो, जहाँ लेखकले आफू दोषी नभएको स्पष्ट पारेका थिए।

बैठकमा सहभागी नेताहरूले पार्टीभित्रैबाट गृहमन्त्रीको राजीनामा मागिएकोप्रति असन्तोष व्यक्त गर्दै सो माग गर्ने नेताहरू – डा. शेखर कोइराला, डा. सुनिल शर्मा र राजेन्द्र बजगाईं – सँग स्पष्टीकरण माग्न सभापतिलाई आग्रह गरेका थिए। नेता डा. शशांक कोइरालाले पत्रकारहरूसँग कुराकानी गर्दै देउवालाई उनीहरूलाई बोलाएर स्पष्ट पार्न आग्रह गरिएको जानकारी दिए।

उनका अनुसार, पार्टीभित्रको आपसी मुठभेडले कसैलाई फाइदा नपुर्‍याउने भन्दै संवाद र स्पष्टिकरणमार्फत निकास खोज्नुपर्ने धारणा बैठकमा व्यक्त भएको थियो। यता, गृहमन्त्री लेखकको राजीनामा आवश्यक रहेको धारणा पार्टीका संस्थापनइतर नेता डा. शेखर कोइरालाले दोहोर्याएका छन्। उनी पक्षीय सांसदहरू डा. सुनिल शर्मा र राजेन्द्र बजगाईंले पनि लेखकले राजीनामा दिनुपर्ने धारणा राखेका थिए।

तर बैठकपछि पार्टी प्रवक्ता डा. प्रकाशशरण महतले पदाधिकारी बैठकले गृहमन्त्री लेखक निर्दोष रहेको निष्कर्ष निकालेको जानकारी दिएका छन्। सभापति देउवाले भने स्पष्टीकरणको मागमा कुनै प्रतिक्रिया नदिएको नेता कोइरालाले बताएका छन्c