खोज

गुल्मी, १० जेठ ।

गुल्मीको पनाहा खोलामा शुक्रवार विपद्जन्य कृत्रिम घटना अभ्यास प्रदर्शन गरिएको छ । रेसुङ्गा नगरपालिका र इस्मा गाउँपालिकाको सिमाना पनाहा खोलामा नेपाली सेना, सशस्त्र प्रहरी बल र नेपाल प्रहरीको संयुक्त सहभागितामा उक्त विपद्जन्य कृत्रिम घटनाको अभ्यास गरिएको हो ।

विपद्को समयमा तत्काल कसरी उद्धार गर्ने र कसरी त्यसको व्यवस्थापन र उद्धार क्षमतामा सुधार ल्याउन सकिन्छ भन्ने उद्देश्यले पनाहा खोलामा एकदिवशीय कृत्रिम घटना अभ्यास कार्यक्रम प्रदर्शन गरिएको हो । “अभ्यास मनसुन –५” नामकरण गरिएको उक्त कार्यक्रममा आगलागी, बाढी, डुबान, खोँच तथा अफ्ठेरो भूभाग जस्ता सम्भावित स्थानमा प्राकृतिक प्रकोपमा परेका व्यक्तिलाई कसरी प्रभावकारी रूपमा उद्धार गर्ने भन्ने विषयमा घटनाको अभ्यास गरिएको थियो ।

कार्यक्रममा नेपाली सेनाको श्री रामवाण गुल्म, सशस्त्र प्रहरी बल, नेपाल प्रहरी लगायतको समन्वयमा विभिन्न सामग्री र उपकरणहरूको प्रयोग गरी उद्धार सम्बन्धी कार्य गरिएको थियो । त्यसका साथै आगलागी नियन्त्रण, डुबेका व्यक्तिको उद्धार, घाइतेको प्राथमिक उपचार, घाइतेलाई सुरक्षित स्थानमा स्थानान्तरण जस्ता कृत्रिम अभ्यास समेत प्रदर्शन गरिएको थियो । अभ्यास कार्यक्रममा प्रमुख जिल्ला अधिकारी जनार्दन गौतमले यस्ता प्रकारका अभ्यासहरू जिल्लामा आवश्यक रहेको भन्दै यिनले स्थानीय तहमा विपद् व्यवस्थापन क्षमतामा सुधार ल्याउने बताए ।

उनले कृत्रिम घटना अभ्यासले आपत्कालीन अवस्थामा सुरक्षा निकायबिचको समन्वयलाई आगामी दिनमा थप मजबुत बनाउने विश्वास व्यक्त गरे । आपत्कालीन परिस्थितिमा कठिन भूभाग, पहाडको खोँच, खोलामा डुबेको स्थिति तथा आगलागी भएको अवस्थामा तत्कालै कसरी उद्धार गर्ने भन्ने विषयमा जानकारी दिनका लागि कृत्रिम घटना अभ्यास गरिएको तम्घास स्थित श्री रामवाण गुल्मका प्रमुख एवं सेनानी तिलक केसीले बताए । जिल्ला प्रशासन कार्यालय गुल्मीको समन्वयमा सञ्चालन भएको अभ्यास कार्यक्रममा विभिन्न कार्यालयका प्रमुख तथा प्रतिनिधि, स्थानीयवासी, शिक्षक तथा विद्यार्थीहरूको सहभागिता रहेको थियो ।