खोज

बुटवल, १० जेठ ।

बुटवलमा सम्पन्न अन्तर विद्यालय स्तरीय प्रथम छात्र मेयर कप क्रिकेट प्रतियोगिताको उपाधि न्यु होराईजन ईगलिस बोर्डिङ स्कुलले चुमेको छ । शुक्रवार भएको फाइनलमा कान्ति माविलाई ७ विकेटले पराजित गर्दै उपाधि चुमेको हो । उपाधिसँगै न्यु होराईजनले नगद ५० हजार रूपैया, कप, मेडल, प्रमाणपत्रबाट पुरस्कृत भयो । उपविजेता कान्ति भने नगद ३० हजार रुपैयाँ, कप, प्रमाणपत्रमा चित्त बुझायो ।  प्रतियोगितामा न्यु होराईजनका अब्राहम अली प्लेयर अफ दी सिरिज घोषित हुँदै नगद ८ हजार, कप तथा अली नै उत्कृष्ट बलर समेत बन्दै थप ५ हजार रुपैयाँ, कपबाट पुरस्कृत भए ।

न्यु होराईजनका सिद्धान्त ढकाल उत्कृष्ट ब्याटस्म्यान घोषित हुँदै नगद ५ हजार रुपैयाँ, कपबाट पुरस्कृत भए ।  बुटवल उपमहानगरपालिका, नगर खेलकुद विकास समितिको आयोजनामा नरैनापुर क्रिकेट खेल मैदानमा भएको फाइनलमा टस जितेर कान्तिले ब्याटिङ रोज्दै १३ ओभरमा ५८ रन मात्र जोडेका थिए । कान्तिका समीर बिकले ११ बलमा १२ तथा कृष्ण अधिकारीले १४ बलमा १० रनबाहेक अन्य ब्याटस्म्यानहरूले दोहोरो अङ्कको रन जोड्न सकेनन् । न्यु होराईजनका अब्राहम अलिले शानदार ४ तथा अमृत अर्यालले २ विकेट लिए । झिनो लक्ष्य पछ्याएको न्यु होराईजनले १०.३ ओभरमा ३ विकेटको नोक्सानीमा भेटायो । न्यु होराईजनका रन्जित मौर्याले ७ बलमा १७ तथा सफल भट्टराईले ३७ बलमा १६ रनको योगदान दिए । कान्तिका बिशाल मरासिनी र कृष्ण अधिकारीले समान १–१ विकेट लिए । खेलमा न्यु होराईजनका अब्राहम अली प्लेयर अफ दी म्याचबाट पुरस्कृत भए ।

एक समारोहका बिच बुटवल उपमहानगरपालिकाका नगरप्रमुख खेलराज पाण्डेय, उपप्रमुख सावित्रीदेवी अर्याल, नगर प्रवक्ता शिव राना, वडा नं १६ का वडाध्यक्ष कृष्ण प्रसाद पौडेल, वडा नं. ५ का वडाध्यक्ष हरिप्रसाद श्रेष्ठ, कान्ति माविका प्रधानाध्यापक गोविन्द ज्ञवाली, न्यु होराईजन ई बोर्डिङ स्कुलका प्रधानाध्यापक लोकनाथ उपाध्याय, रुपन्देही क्रिकेट सङ्घका कोषाध्यक्ष निरजप्रताप खाड, नगर खेलकुद विकास समितिका संयोजक बोनिन पिया, सदस्य लालहरि पाण्डेयले विजेता, उपविजेता तथा उत्कृष्ट खेलाडीहरूलाई पुरस्कार वितरण गरे । कार्यक्रममा बुटवल उपमहानगरपालिकाका नगरप्रमुख खेलराज पाण्डेयले विद्यालय स्तरमा साख जगाउने गरी उत्कृष्ट प्रतियोगिताहरू गरिरहेको बताए । खेलकुदलाई महत्त्व दिँदै नगरबाट खेल गतिविधिलाई प्राथमिकतामा राखेको उनले बताए । ‘क्रिकेटका लागि पूर्वाधार निर्माण अबको प्राथमिकता हो ।’–उनले भने ।

कार्यक्रममा नगर खेलकुद विकास समितिका संयोजक बोनिन पियाले क्रिकेट खेल प्रतिको क्रेजलाई मध्यनजर गरी आयोजना गरिएको प्रतियोगिता सफल रहेको भन्दै आगामी दिनमा समेत निरन्तरता दिने बताए । खेल संयोजक सरोज सिंह क्षेत्रीले प्रति खेलाडी १ लाख रूपैया बिमा र क्यानको समन्वयमा प्राविधिक सहयोग तथा विभिन्न खेल संस्थाहरूको सहयोगमा सफल भएको बताए । जेठ ४ गतेबाट सुरु भएको प्रतियोगितामा १० संस्थागत र ७ सामुदायिक गरी १७ विद्यालयहरूले प्रतिस्पर्धा गरेका थिए ।