खोज

बुटवल, ८ जेठ । आजको शहरी जीवनशैली मानिसका लागि दिनप्रतिदिन अभिशाप बन्दै गएको छ । बिहान उठेपछि नै दैनिकीको दौडधुपमा व्यस्त हुने, समयमै खाना नपुग्ने, शारीरिक व्यायाम नगर्ने र ध्यान तथा योगको पूर्ण अभावले मानिसहरू विभिन्न रोगब्याधीको चपेटामा परिरहेका छन् ।
विशेषगरी मानसिक तनाव, उच्च रक्तचाप, मधुमेह, मोटोपनजस्ता जीवनशैलीजन्य रोगहरू तीव्र रूपमा बढिरहेका छन् । स्वास्थ्य विशेषज्ञहरूका अनुसार शारीरिक सक्रियता, नियमित योग अभ्यास र ध्यानमार्फत मात्रै यस्तो अवस्थाबाट बच्न सकिन्छ । यसै कुरालाई मध्येनजर गरि बुटवल–१३ बदेलपोखरीमा आरोग्य मिलन जीवनयोग प्रयोगशालाको स्थापना गरी ‘मोक्ष सभाहल’ संचालनमा ल्याइएको छ । जहाँ योग, ध्यान, जीवन विज्ञान र परोपकारको माध्यमबाट मानिसलाई स्वस्थ र सन्तुलित जीवनको बाटो देखाउने प्रयास गरिने आयोजकको भनाई छ ।

बुटवलका पुरानो पर्यटन ब्यवसायी माधव नेपाल र गमला नेपाल दम्पतीले बुटवल–१३ स्थित बदेलपोखरीमा ‘आरोग्य मिलन जीवनयोग प्रयोगशाला’ अन्तर्गत ’मोक्ष सभाहल’ निमार्ण गरेका हुन । एक समारोहबीच श्रदेय गुरु रमेश नेपालले सभाहल उद्घाटन गर्दै जीवनको सार, योग अभ्यास र परोपकारको महत्वमाथि प्रकाश पारे । नेपालले मानिसको ब्यस्त जीवनशैलीका कारण विभिन्न रोगब्याधी बढिरहेको भन्दै जीवनमा सन्तुलन कायम राख्न योग र अध्यात्म अपरिहार्य भएको उल्लेख गरे । “सुखको सूत्र मानव जातिको सेवा हो,” उनले भने, “परिवारमा पारस्परिक आदर, विश्वास र समझदारी भए त्यहाँ नै स्वर्ग बस्दछ ।” उनका अनुसार, धन र ज्ञान मात्र पर्याप्त होइन, मानिसले दिने बानी र सेवा भाव अपनाउन आवश्यक रहेको बताए । “दान गरेर कोही कंगाल भएको छैन, मागेर कोही अरबपति भएको छैन,” उनले भने, “ईश्वरलाई मूर्तिमा होइन, जीवित प्राणीको सेवामा खोज्नुपर्छ ।”

‘मोक्ष सभाहल’ मा हरेक बिहान डेढ घण्टा योग अभ्यास गरिने जानकारी दिँदै यसले मानसिक तथा शारीरिक सशक्तिकरण गरी जीवनमा मुक्ति प्राप्त गर्न सकिने बताए । उनले भने, “हरेक मानिसको हृदयमा भगवान बस्नुहुन्छ भन्ने कुरा व्यवहारमा उतार्न जरुरी छ । अरुलाई दुःख दिएर कमाएको धनले शरिरमा नै पीडा ल्याउँछ । कमाई अरुलाई खुशी बनाउने माध्यम हुनुपर्छ ।” उनका अनुसार मानिसले आफ्नो क्षमतालाई चिन्न नसक्दा जीवनमा पछि पर्नु परेको छ । त्यसैले आत्मपरीक्षण र योग अभ्यास जीवन सुधारको मूल उपाय हुन् । गुरु नेपालले भने, “वेदब्यासले वेदको सार परोपकारमा खोजेका छन् । कुनै पनि जीवलाई दुःख दिनु ईश्वरलाई दुःख दिनु हो । त्यसैले परोपकार नै सर्वोच्च धर्म हो ।”

सभाहल निमार्णको उद्देश्य समुदायका व्यक्तिको शारीरिक, मानसिक र आत्मिक कल्याणसहित समाजमा सकारात्मक परिवर्तन ल्याउनु रहेको समाजसेवी माधव नेपालले बताए । बगैचासहितको आर्कषक रमणिय सभाहलको बढीभन्दा बढी सदुपयोग गर्न समेत उनले आग्रह गरे । यसैबिच आगामी असार ६ गते तनाव व्यवस्थापन र ७ गते सुशी विज्ञान सम्बन्धी विशेष प्रशिक्षण सञ्चालन गरिने भएको छ ।