खोज

बुटवल, ८ जेठ । रुपन्देही जिल्लास्तरीय राष्ट्रपति रनिङशिल्ड प्रतियोगिता जेठ १७ र १८ गते हुने भएको छ । १५ औ राष्ट्रपति रनिङशिल्ड प्रतियोगिता २०८१–८२ जिल्ला स्तरिय राष्ट्रपति रनिङशिल्ड प्रतियोगिता ब्यवस्थापन तथा निर्देशन समितिको विहिबार बसेको बैठकले तिलोत्तमा नगरपालिकामा जेठ दुइ दिने प्रतियोगिता गर्ने निर्णय गरेको हो ।

कार्यक्रममा रुपन्देही जिल्ला खेलकुद विकास समिति बुटवलका कार्यालय सचिव चन्द्रकान्त आचार्यले कुल १२ विधाको हुने प्रतियोगितामा जिल्लाका केवल आठ पालिकाहरुले मात्र सहभागिता जनाउने बताए । ‘रुपन्देहीका बुटवल उपमहानगरपालिका, तिलोत्तमा, सैनामैना, देवदह, सिद्धार्थनगर, लुम्बिनी सास्कृतिक नगरपालिका, सियारी, गैडहवा गाउपालिका गरि आठ पालिकामा छनौट खेल सम्पन्न गरेका छन ।’– उनले भने । बाकी आठ पालिकालाई के कति कारणले छनौट खेल खेलाउन असमर्थ भएको भनि कार्यालयबाट स्पष्टिकरणको पत्र काटेको उनले बताए ।
प्रदेशस्तरीय प्रतियोगिता जेठ २३, २४ र २५ मा दाङ गर्ने मिति तोकिसकेको हुदा पनि त्यो अघि जिल्ला छनौट गर्नुपर्ने भएको उनले बताए । प्रतियोगिता अन्तरगत एथ्लेटिक्समा (छात्र/छात्रा) गरि ३ हजार, १५००, ८००, ४००, २०० र १०० मिटर दौड, लङजम्प (छात्र/छात्रा), हाईजम्प, ज्याभलिन थ्रो, सटपुट, त्रिपलजम्प, रिले ४ बाई १००, ४ बाई ४००, कबड्डी, भलिबल, उसु, कराते, तेक्वाण्डो हुने उनले बताए ।

कार्यक्रममा आयोजक नगर खेलकुद विकास समिति तिलोत्तमाका लोक पुनले खेल गतिविधिलाई एउटा सिस्टममा लैजान जरुरी रहेको बताए । हतार र नामका लागिमात्र कार्यक्रम गर्नुभन्दा पनि खेलाडीहरुलाई प्लेटफर्म दिने गरि उत्कृष्ट प्रतियोगिता बनाउनुपर्नेमा जोड दिए । न्यून बजेटमा कार्यक्रम गर्न कठिनाई हुने भन्दै यसका लागि आवश्यक बजेट थपका लागि प्रदेश र संघबाट माग गर्नुपर्नेमा जोड दिए । आफनो पालिमा सबैभन्दा पहिले छनौट खेल सकेको भएपनि तालिकाअनुसार खेल नहुदा खेलाडीहरु निरास रहेको उनले दुखेसो गरे । जिल्लास्तरिय प्रतियोगिताको आयोजना गर्न पाउनु सौभाग्य भएको भन्दै यसका लागि कुन्जलापुर खेलमैदान, र दुर्गापुर खेलमैदानसहित अन्य ईन्डोर खेलमैदान उपयुक्त हुने बताए ।

कार्यक्रममा जिल्ला समन्वय समितिका ऋषिराम बश्याल, कालिका मानव ज्ञान माबि प्रधानाध्यापक दिनेश थापा, ईलिट बोर्डिङ स्कुलका एनबि क्षेत्री, नेपाल खेलकुद पत्रकार मंचका अध्यक्ष सुमन अधिकारी, वरिष्ठ प्रशिक्षक मोहन घले, रुपन्देही भलिबल संघका अध्यक्ष सुरेन्द्र शाक्य, तेक्वान्दो प्रशिक्षक प्रकाश राजभण्डारी, रुपन्देही जिल्ला एथ्लेटिक्स संघका अध्यक्ष दिनेश आचार्यसहित सुरक्षा निकायबाट सुझाव संकलन गरिएको छ ।