खोज

बुटवल, ६ जेठ । बुटवलमा जारी प्रथम मेयर कप विद्यालयस्तरिय क्रिकेट प्रतियोगिता २०८२ मा कान्ति माबिले दुई खेलमा लगातार जित निकाल्दै अन्तिम चारमा स्थान बनाएको छ । बुटवल उपमहानगरपालिका नगर खेलकुद विकास समिति बुटवलको आयोजनामा मंगलबार भएको पहिलो क्वाटरफाईनल खेलमा कान्तिले एभरेष्ट बोर्डिङ स्कुललाई १ रनले पराजित गर्दै सेमीफाईनलमा स्थान बनाएको हो । यसैगरि मंगलबार नै भएको दुई खेलमा विजयी हुदै न्यू होराईजन माबि र नयागाउ माबि क्वाटरफाईनलमा प्रवेश गरेका छन । न्यू होराईजन माबिले कालिका माबिलाई ६५ रन तथा नयागाउ माबिले सुमित ईगलिस बोर्डिङ स्कुललाई ३० रनले पराजित गर्दै क्वाटरफाईनलमा प्रवेश गरेको हो ।

नरेनापुर क्रिकेट मैदानमा भएको खेलमा टस जितेर एभरेष्टले बलिङ रोजेपछि ब्याटिङ गर्न मैदान उत्रेको कान्तिले निर्धारित १२ ओभरमा ७ बिकेटको नोक्सानीमा ८७ रन जोड्यो । खराब शुरुवात गरेको कान्तिका मध्यम क्रमका ब्याट्सम्यानले रन जोड्दा सम्मान जनक स्कोर खडा गरेको थियो । बिशाल मरासिनीले नटआउट २८ तथा कृष्ण अधिकारीले १३ रनको योगदान दिए । एभरेष्टका सौरभ पाण्डे र आयुष जयसवालले समान २–२ बिकेट लिए । मध्यम लक्ष्य पछ्याएको एभरेष्ट ११.५ ओभरमा केवल ८६ रनमा समेटियो । उसका लागि कृष्ण चौधरीले १८, रबि यादवले १५ रन जोडे पनि जितका लागि पर्याप्त भएन । कम स्कोरमा रोक्न कान्तिका बिशाल मरासिनीले ३ तथा कृष्ण अधिकारीले २ बिकेट लिए । खेलमा कान्तिका बिशाल मरासिनी प्लेयर अफ दी म्याचबाट पुरस्कृत भए ।

अर्को खेलमा टस जितेर कालिका माबिले बलिङ रोजेपछि न्यू होराईजनले निर्धारित १२ ओभरमा ७ बिकेटको नोक्सानीमा ११४ रन जोड्यो । न्यू होराईजनका संगम पाण्डेले २४, सिद्धार्थ ढकालले १४ रन जोडे । कालिकाका शोभाकर सुवेदीले ३ बिकेट लिए । मध्यम लक्ष्य पछ्याएको कालिका ११.४ ओभरमा सबै बिकेट गुमाएर केवल ४९ रनमात्र जोड्न सफल भयो । कालिकाका लागि आशिष भण्डारीले १३ रनबाहेक अन्य ब्याट्सम्यानले दोहोरो अंकको रन जोड्न सकेनन । कम स्कोरमा रोक्न न्यू होराईजनका अब्राहम अलिले ४ तथा शुभम पाण्डेले ३ बिकेट लिए । खेलमा अब्राहम अलि प्लेयर अफ दी म्याचबाट पुरस्कृत भए ।

यता वर्षाका कारण ७ ओभरमा छोट्याइएको खेलमा टस जितेर ब्याटिङ रोज्दै नयागाउले निर्धारित ७ ओभरमा ६० रन जोड्यो । उसका लागि ओपनर सुधन पोखरेलले २७ रनको योगदान दिएका थिए । कम स्कोरमा रोक्न सुमितका समिर परियार र अफ्रिथ खानले समान २–२ बिकेट लिए । ६१ रनको लक्ष्य पछ्याएको सुमित ७ ओभरमा ७ बिकेटको नोक्सानीमा ३० रनमा समेटियो । उसका लागि ओपनर अफ्रिथ खानले ६ रन जोडे । नयागाउका बिशव रायमाझीले २ बिकेट लिए । खेलमा सुधन पोखरेल प्लेयर अफ दी म्याचबाट पुरस्कृत भए ।

प्रतियोगिताको उपाधि विजेता टिमले नगद ५० हजार रुपैया, कप, मेडल, प्रमाणपत्र तथा उपविजेता टिमले नगद ३० हजार रुपैया, कप, प्रमाणपत्रबाट पुरस्कृत गरिने खेल संयोजक सरोजसिहले बताए । प्रतियोगितामा म्यान अफ द सिरिज ८ हजार तथा उत्कृष्ट बलर, उत्कृष्ट ब्याट्सम्यानलाई जनही ५ हजार रुपैया, मेडलबाट प्रमाणपत्रबाट पुरस्कृत गरिने छ । प्रति खेलाडी १ लाख रुपैया बिमा र क्यानको समन्वयमा प्राविधिक पक्षलाई अघि बढाईएको उनले बताए । जेठ ९ गतेसम्म संचालन हुने प्रतियोगितामा संस्थागत १० र सामुदायिक ७ गरि १७ टिमले प्रतिस्प्रर्धा गरेका छन ।