खोज

कपिलवस्तु, ०६ जेठ ।
कपिलवस्तु नगरपालिका वडा नम्बर २ स्थित श्री बुद्धपद्म माध्यमिक विद्यालयलाई पत्रु खाना (जंक फुड) निषेधित विद्यालय घोषणा गरिएको छ । स्वास्थ्य कार्यालय कपिलवस्तुको आयोजनामा विद्यालयमा आयोजित घोषणा सभामा विद्यालयलाई जिल्लाको सातौं जंक फुड निषेधित सामुदायिक विद्यालय घोषणा गरिएको हो ।
यस अघि जिल्लाको यशोधरा गाउँपालिका ५ को श्री अनिरुद्ध पब्लिक मावि, बुद्धभूमि २ को गौतम बुद्ध मावि, शिवराज ५ को राष्ट्रिय मावि चन्द्रौटा, महाराजगंज १ को जानकी मावि, विजयनगर ७ को द्रोपतीदेवी मावि र कृष्णनगर २ को देवी बिद्या पिठलाई जंक फुड निषेधित सामुदायिक विद्यालय घोषणा गरि सकिएको छ । जिल्लाको शुद्धोधन गाउँपालिका, मायादेवी गाउँपालिका र बाणगंगा नगरपालिकाको १-१ सामुदायिक विद्यालयलाई जंकफुट निषेधित विद्यालय घोषणा गरि जिल्लाका सबै पालिकामा गरि १० विद्यालयलाई घोषणा गर्ने अभियान चलाइएको हो ।

गत बर्ष लुम्बिनी प्रदेश सरकारको कार्यक्रम अन्र्तगत जिल्लाभरका २५ सामुदायिक विद्यालयमा अध्ययनरत छात्राहरूको हेमोग्लोबिन परिक्षण गर्ने क्रममा ६७ प्रतिशत छात्रामा रक्तअल्पताको समस्या देखिए पछि प्रदेश सरकारले कपिलवस्तु जिल्लामा मात्रै जंक फुड निषेधित विद्यालय घोषणाको कार्यक्रम सञ्चालन गरेको स्वास्थ्य कार्यालय कपिलवस्तुका पोषण फोकल पर्सन मोहम्मद ईरफानले जानकारी दिए । घोषणा पुर्व सबै पालिकामा कार्यक्रम बारेको अभिमुखीकरण, विद्यालयमा शिक्षक र व्यवस्थापन समितिका प्रतिनिधिलाई अभिमुखीकरण गराएर मात्रै घोषणा गर्न थालिएको उनले स्पष्ट पारे । घोषणा पश्चात विद्यालयले विद्यालयमा जंग फुडको सेवनलाई पुर्ण रूपमा निषेध गरे नगरेको अनुगमनका लागी सम्बन्धित नगरपालिकाको उपप्रमुखको संयोजकत्वमा प्रमुख प्रशासकिय अधिकृत, स्वास्थ्य शाखा प्रमुख, विद्यालयमा प्रधानाध्यापक सदस्य र नगर शिक्षा शाखा प्रमुख सदस्य सचिव रहने गरि ५ सदस्यीय अनुगमन समिति गठन गरिएको ईरफानले स्पष्ट पारे ।

विद्यालयमा जंक फुड बारे जानकारी दिई नियन्त्रण गर्ने, विद्यालय दिवा खाजालाई प्रबद्र्धन गर्ने, स्वस्थ्यकर खानाको बिकल्प प्रदान गरि विद्यार्थीलाई स्वस्थ्य खानपानका लागि प्रोत्साहन गर्ने र अनुगमन समिति गठन गरि निरन्तर अनुगमन गर्ने उद्देश्यका साथ बिगतमा अभिमुखीकरण कार्यक्रम गरिएको स्वास्थ्य कार्यालयका ल्याब टेक्निसियन श्रीधर खनालले जानकारी दिए ।गत बर्ष नगरको बुद्धपद्म माध्यमिक विद्यालय र तिलौराकोट मा.बि. गोबरीका छात्राहरूको हेमोग्लोबिन परिक्षणका क्रममा ८३ प्रतिशत छात्रामा रक्तअल्पताको समस्या देखिएकाले यो नगरका विद्यालयमा जंक फुड निषेध आवश्यक रहेकोमा उनले जोड् दिए ।

विद्यार्थीमा जंक फुडको सेवन रोक्नका लागी बिहानीको प्रार्थनामा नै सचेतना प्रवाह गर्दै आएको जनाउदै विद्यालय वरिपरि जंक फुड बिक्री वितरणमा स्थानिय प्रशासनले समेत कडाई गर्न आवश्यक रहेको बुद्धपद्म माध्यमिक विद्यालयमा प्रधानाध्यापक बाबुराम भण्डारीले बताए । जिल्लाका सबै विद्यालयमा जंक फुड निषेध गरेर अगाडी बढ्न आवश्यक रहेकोमा जिल्ला समन्वय समिति कपिलवस्तुका प्रमुख बाबुराम आचार्यको जोड थियो । घोषणा पश्चात सबैको सहकार्यमा जंग फुडको बिक्री बितरण र सेवनमा कडाई गर्न आवश्यक रहेकोमा विद्यालय व्यवस्थापन समितिका अध्यक्ष आजाद अहमद दर्जीले जोड दिए ।

जंक फुड निषेधित विद्यालयको मापदण्डमा जंग फुड निषेध बारे होर्डिङ बोर्ड वा भित्ते लेखन गरेको हुनु पर्ने, विद्यालयको चमेना गृहले बिक्री वितरणमा जंक फुड निषेधित गरेको हुनु पर्ने, दिवा खाजामा जंक फुड निषेधको सुनिश्चितता, घर बाट ल्याउने खाजामा जंक फुड नभएको सुनिश्चित भएको, स्थानिय स्वास्थ्य संस्थाबाट महिनाको १ दिन पोषण स्वास्थ्य शिक्षा सञ्चालन भएको र विद्यालयको १ सय मिटरको क्षेत्र भित्र मादक पदार्थ तथा सुर्तीजन्य पदार्थको बिक्री बितरण निषेधको सुनिश्चितता भएको हुनु पर्ने मापदण्ड रहेको छ । सोहि मापदण्ड पुरा गरिएको सुनिश्चितताका आधारमा विद्यालयलाई जंक फुड निषेधित गरिएको जनाइएको छ ।