खोज

कपिलवस्तु,  ४ जेठ ।

तौलिहवा भैरहवा सडकखण्डमा दैनिक चल्ने यात्रुबाहक बसको चरम लापरवाहीका कारण तौलिहवामा सडकमा दुर्घटनाको जोखिम बढ्दै गएको छ ।

सो रुट हुदैं भैरहवा र अलिगढवाबाट तौलिहवा पुग्ने यात्रुबाहक बसहरुले जिल्ला प्रशासन कार्यालय चोकमा सडकमा लगाएको मिडियनको तारजालीको छेकबार तर्फ बस रोकेर यात्रुहरु ओराल्ने गर्दा दुर्घटनाको जोखिम बढेको हो ।

ट्राफिक प्रहरीको आँखा छलेर सो रुटमा चल्ने प्राचिन कपिलवस्तु यातायात प्रा.लि. र सिद्धार्थ यातायात लगायतका सवारी साधनले निर्वाध रुपमा सडक अबरुद्ध हुने गरि मुल सडकमै सवारी साधन रोकेर यात्रु ओराल्ने गरेका छन । मुल बाटोमा यात्रुवाहक सवारी रोकेर मेडियनको छेकबार तर्फ सवारी उतार्दा यात्रुलाई सिधै सडक पार गर्नुपर्ने बाध्यता आउने गरेको छ । तारजालीको कारण यात्रुहरु बसको अघि र पछि घुमेर सडक काट्नु पर्ने बाध्यताका कारण दैनिकजसो दुर्घटना बढ्दो छ । यसरी बिच सडकमै सवारी रोक्दा यात्रा गर्ने बालबालिका, वृद्ध र अपाङ्गता भएका यात्रुका लागि थप जोखिम बढ्दो छ ।

प्राचिन कपिलवस्तु यातायातको चरम लापरवाहीको नमुना कपिलवस्तु नगरपालिका वडा नम्बर १ को बसपार्कमा समेत देखिन्छ । व्यवस्थित बसपार्क भए पनि तौलिहवा मर्यादपुर रुटमा आबद्ध सवारी साधनले बसपार्क बाहिरको मुल सडकमा सवारी साधन रोकेर दुर्घटना निम्त्याउने गरेका छन । सो रुटमा ओभरलोड यात्रु राख्दा अघिल्लो महिना झुण्डिएर यात्रा गर्ने तिन जना लडेर घाईते भएका थिए ।

त्यति मात्र होइन सो रुटमा चल्ने सवारी साधनले सरकारले तोकेको भन्दा भाडादर भन्दा बढि भाडा समेत असुल गर्दै आएको पाइएको छ । सो प्रा.लि.मा आबद्ध कतिपय सवारी साधनले समयमा गन्तब्यमा नपुर्याउने, यात्रुलाई चढाएर अन्तिम समयमा यात्रु कम भएकाले गन्तब्यमा पुग्न नसकिने भन्दै अर्को सवारी साधनमा पठाउने गरेको यात्रुहरुको गुनासो छ । त्यस्तै तौलिहवादेखी मर्यादपुर, बहादुरगंज सहितका रुटमा चल्ने सवारी साधन पुराना र मर्मत सम्भार नहुँदा बिचबाटैमा बिग्रीने समस्याले यात्रुहरुले सास्ती भोग्दै आएका छन् ।

तौलिहवा देखी मर्यादपुर रुटमा चल्ने सवारी साधनलाई बिच सडकमा रोकी यात्रु चढाउने कार्य गर्दा सो रुटमा दुर्घटनाको जोखिम बढ्नुका साथै आवागमनमा अवरोध पर्ने गरेको स्थानिय समाजसेवी दिनेश हमाल बताउँछन् । यात्रुबाहक सवारी साधनकोे चरम लापरवाहीमा समेत नियमनकारी निकाय मौन बसेको भन्दै उनले आक्रोश पोखे ।

प्राचिन कपिलवस्तु यातायात प्रा.लिका रुट सदस्य ब्रह्मानन्द चौधरी भने पार्किङ्ग गर्ने स्थानको अभावमा समस्या पर्दे आएको बताउछन् । प्राचिन कपिलवस्तु यातायातमा आबद्ध यात्रुवाहक सवारी साधनलाई ओभरलोड नगर्न र मुल सडकमा यात्रुबाहक सवारी नरोक्न कडाई गरिएको कपिलवस्तु यातायात प्रा.लि. का अध्यक्ष मोहम्मद रफिक दाबी गर्छन् । अध्यक्ष रफिकले आफुहरुले कडाई गरेको दावी गरेको भए पनि सवारी साधनले भने चरम लापरवाही गर्दै आएका छन ।

जिल्ला ट्राफिक कार्यालय कपिलवस्तुको तथ्याङ्कले चालु आर्थिक बर्षको बैशाख मसान्त सम्मको अबधीमा जिल्लाभर ३ सय ३३ वटा दुर्घटनाका घटना भएका छन् । जसमा ६० जनाको मृत्यु भएको छ भने २ सय १३ जना गम्भिर घाईते र ३ सय २४ जना सामान्य घाईते भएका छन् । दुर्घटनामा ८ वटा चौपायाको मृत्यु भएको छ भने २ चौपाया घाईते भएका छन् ।

तौलिहवा क्षेत्रमा चल्ने सवारी साधनलाई ओभरलोड नगर्न तथा सहि स्थानमा सवारी साधन रोक्न पटक पटक सचेत गराईएको जिल्ला ट्राफिक कार्यालय कपिलवस्तुका प्रमुख प्रहरी निरिक्षक पंकज चुदालीले बताए ।

उनले ट्राफिक नियमको पालना नगर्ने सवारी साधनलाई कडाईका साथ कारवाही गरिने स्पष्ट पारे ।