खोज

नेपालगञ्ज, ३ जेठ ।

जिन्दगी और साथ थोडा दे
देश अपना हमे बनाना है

जिन्दगीको ८८औँ वसन्तमा रहेका शौक नेपालीका नामले प्रसिद्धि कमाएका अब्दुल लतिफ शौकले आफूभन्दा पाँच दशक कान्छा गजलकार लक्ष्मण सँगमसेत सहभागी मुशायरामा गजलको यो शेर सुनाउँदा हल तालीले गुन्जियो ।

नेपालगन्जमा लामो समयपछि शुक्रबार मुशायरा आयोजना गरिएको थियो । नेपालगन्जका उर्दुभाषी शायरहरु एवं नेपाली भाषी चर्चित गजलकारहरु एकसाथ मुशायरामा प्रस्तुत भएका थिए । नेपलगन्जमा यस्तो मुशायरा करिब एक दशकपछि भएको हो । मध्यपश्चिम स्रष्टा समाजको आयोजनामा भएको उक्त मुशायरामा ११ जना शायर तथा गजलकारहरुले नेपाल तथा भारतका मुशायरा पारखीहरुमाझ आफ्ना छानिएका रचनाहरु सुनाए ।

नेपालगन्जका साहित्यकार, राजनीतिकर्मी, चिकित्सक तथा अन्य पेशाकर्मीहरुले लामो समयपछि शहरमा मुशायराको आनन्द लिन पाइएको भन्दै खुसी व्यक्त गरे ।

मुशायरामा शौक नेपालीसँगै उर्दुभाषी शायरहरु शैयद नेपाली, मुस्तफा अहसन कुरैसी, जमिल हाशमी, अन्सर नेपाली, सर्वर नेपाली र मो. आरिफ अन्सारीले आफ्ना उत्कृट गजलहरु सुनाए । यसैगरी डा. निरज भट्टराई, हुकुम धड्कन र लक्ष्मण सँगमले नेपाली भाषामा र सविन एकतारेले नेपाली तथा अवधी भाषमा गजल सुनाए । हुकुम, अन्सर र शैयदले गायनमा पनि गजल सुनाएका थिए ।

कार्यक्रममा साहित्यिक कार्यक्रममा विरलै सहभागी हुने व्यक्तिहरु पनि सहभागी भएका थिए । उनीहरुले मुशायरामा उच्च कोटीका गजलहरु सुन्न पाइएको प्रतिक्रिया दिए ।

कार्यक्रममा वरिष्ठ साहित्यिक पत्रकार, सम्पादक एवं साहित्यकार नगेन्द्रराज शर्मा, नेपाली लेखक संघका अध्यक्ष वियोगी बुढाथोकी, वरिष्ठ कथाकार सनत रेग्मी, प्रा.डा.कृष्णप्रसाद घिमिरे, डा. हरि तिमिल्सेना, प्राज्ञ शभा सदस्य शशीराम कार्कीसमेतको उपस्थिति रहेको थियो ।

मध्यपश्चिम स्रष्टा समाजका अध्यक्ष बिपी अस्तुले समाजले आयोजना गर्दै आएको कविता श्रवणको श्रृंखला काव्यगन्जको तेस्रो अंकमा मुशायरा आयोजा गरिएको जानकारी दिए ।

यसैगरी सोही कार्यक्रममा विगत ५४ वर्षदेखि निरन्तर प्रकाशित हुँदै आएको साहित्यिक पत्रिका अभिव्यक्तिका संस्थापक सम्पादक नगेन्द्रराज शर्मा र विगत ३२ वर्षदेखि निरन्तर प्रकाशित हुँदै आएको शिवपुरी सन्देश पत्रिकाका प्रकाशक सम्पादक तथा नेपाली लेखक संघका अध्यक्ष वियोगी बुढाथोकीका अनुभवहरु पनि सुनिएको थियो । स्रष्टा समाजकै विमर्श बिन्दु नामक अन्तक्रियात्मक कार्यक्रमको पाँचौ अंकमा शर्मा र वियोगीका अनुभवहरु सुनिएका हुन् । समाजका अध्यक्ष बिपी अस्तुले सहजीकरण गरेको उक्त कार्यक्रममा शर्मा र बुढाथोकीले साहित्यिक पत्रिका सुरु गर्दाका र त्यसलाई निरन्तरता दिँदाका अनुभवहरु साझा गरेका थिए ।

साँझबाट सुरु भएर रातभर चल्ने गजल कार्यक्रमलाई उर्दूमा मशायरा भन्ने गरिन्छ । नेपालगन्जमा विक्रम सम्वत् २०३३ सालदेखि मुशायरा सुरु भएको मानिन्छ । कुनैबेला हरेक महिना नेपालगन्जमा भव्य मुशायरा भइरहन्थे । नेपालगन्जको एकलैनीस्थित मुशाफिर खानामा अबेर रातिसम्म ‘वाह–वाह’ गुन्जिन्थ्यो । दशवर्षे सशस्त्र द्वन्द्वका समयमा राति कार्यक्रम गर्न सक्ने अवस्था भएन । त्यसपछि नेपालगञ्जमा साहित्यिक गतिविधि पातलिँदै गएका शायर मुस्तफा अहसन बताउँछन् ।