खोज

बुटवल, ०३ जेठ ।
बुटवलमा जारी उज्जवल युवा क्लब नकआउट क्रिकेट कप २०८२ को उपाधिका लागि ईलिट जेआर क्लब र बुटवल–१९ भिड्ने भएको छ । बिहीबार भएको पहिलो सेमीफाईनलमा जेआरले आयोजक उज्जवल युथ क्लबलाई २५ रन तथा दोस्रो सेमीफाईनलमा बुटवल–१९ ले वेष्ट्रन क्रिकेट क्लबलाई ३ बिकेटले पराजित गर्दै फाईनल भिडन्त पक्का गरेको हो । फाईनल खेल शनिबार हुनेछ ।

बुटवल उपमहानगरपालिकाको सहयोग तथा उज्जवल युवा क्लबको आयोजनामा बिहीबार भएको बुटवल –१६ स्थित नरेश्वर खेलमैदानमा उज्ज्वले टस जितेर ब्याटिङको निम्तो दिएपछि मैदान उत्रेको इलिट जेआरले निर्धारित १६ ओभरमा १४६ रनको लक्ष्य खडा गरेको थियो । ईलिट जेआरका रूपेश कुर्मीले ३९, अजमल अलीले ३२ तथा रामनाथ कुर्मीले २५ रनको योगदान दिए । उज्जवलका ईमरान खान र सुरज सारुले समान ३–३ बिकेट लिए ।

मध्यम लक्ष्य पछ्याएको उज्जवल निर्धारित १६ ओभरमा सात विकेटको नोक्सानीमा केवल १२१ रनमात्र जोड्न सफल भयो । उसका लागि महेश खड्काले २९ तथा राकेश कुमार गुप्ताले १९ रनको योगदान दिए । कम स्कोरमा रोक्न ईलिट जेआरका तुल बहादुर थापा र शिवशंकर धवलले समान २–२ विकेट लिए । खेलमा जेआरका रूपेश कुर्मी प्लेयर अफ दी म्याचबाट पुरस्कृत भए ।

यसैगरी दोस्रो खेलमा टस जितेर वेष्ट्रनले ब्याटिङ रोज्दै निर्धारित १६ ओभरमा १२२ रनको लक्ष्य खडा गरेको थियो । जसमा विपिन खत्रीले २८ रनबाहेक अन्य ब्याट्सम्यान क्रिजमा टिक्न सकेनन् । बुटवलका डेभिड थापाले ४ विकेट लिए । कम स्कोरलाई बुटवल १९ ले ७ बिकेटको नोक्सानीमा भेटायो । बुटवलका अजय पाण्डेले अर्धसतक पुरा गरे । उनले ५८ रनको योगदान दिए । वेष्ट्रनका सुरज सिहले ४ बिकेट लिए ।  खेलमा बुटवलका डेभिड थापा प्लेयर अफ दी म्याचबाट पुरस्कृत भए ।
प्रतियोगिताको विजेताले नगद ५१ हजार १ सय ५१ रूपैयासहित ट्रफी र मेडल, उपविजेताले नगद २५ हजार ५ सय २४ नगदबाट पुरस्कृत हुने क्लबका अध्यक्ष पंकज शर्मा गौतमले बताए । यसैगरि विधागत रूपमा सर्वोत्कृष्ट खेलाडीलाई ३ हजार ३३३ रूपैयाँ, उत्कृष्ट ब्याटर र उत्कृष्ट बलरलाई समान १ हजार ५५५ रूपैयाँ नगद राशीसहित पुरस्कार प्रदान गरिने सचिव विवेक आचार्यले जानकारी दिए ।