खोज

लमही,०२ जेठ ।

लुम्बिनी प्रदेश सभाको छैठौं अधिवेशनको दोस्रो बैठकमा आर्थिक मामिला तथा योजना मन्त्री धनेन्द्र कार्कीले ‘प्रदेश सामयिक कर राजस्व संकलन सम्बन्धमा व्यवस्था गर्न बनेको विधेयक’ प्रस्तुत गरेका छन् । बैठकमा सहभागी प्रदेशसभा सदस्यहरूले समसामयिक विषयमा बोल्दै नीति तथा कार्यक्रम, बजेटको तालमेल, चालू आर्थिक वर्षको बजेट कार्यान्वयन र आगामी बजेट निर्माणबारे विविध धारणा राख्दै सरकारको ध्यानाकर्षण गराए । सांसद डिल्लीराज भुसालले चालू वर्षको बजेट कार्यान्वयनमा कमी रहेको, त्यसको समीक्षा आवश्यक भएको बताए । दीपेन्द्रकुमार पुनले जनसरोकारका कानुन निर्माणमा सरकारले तत्परता देखाउनुपर्ने र टिमुर खेती प्रवद्र्धन गर्नुपर्ने धारणा राखे ।

रत्नबहादुर खत्रीले प्रतिगमनकारी गतिविधिबाट सचेत रहनु पर्ने बताए भने धनलक्ष्मी श्रेष्ठले नीति तथा कार्यक्रमलाई बजेटको गाइडलाइनका रूपमा लिएर समन्वयको आवश्यकता औंल्याइन् । तारा थापाले कृषि तथा पशुपालन क्षेत्रमा बजेटको ३० प्रतिशत सुनिश्चित गर्न माग गरिन्। चन्द्रकेश गुप्ताले लुम्बिनीको पर्यटकीय विकासका लागि नाका व्यवस्थापनमा सुधार गर्नुपर्ने बताए । शान्ति लोधले भाषणभन्दा व्यवहारिक काममा सरकार गम्भीर हुनुपर्ने बताइन् भने हेमा बेल्वासेले रोजगारी, जनमुखीसंवाद, पुनःस्थापना गृह स्थापना जस्ता कार्यलाई प्राथमिकता दिनुपर्ने धारणा राखिन् ।
दुर्गाप्रसाद चौधरीले राजस्व चुहावट रोक्न र स्रोत पहिचान गर्न सुझाव दिए । मिनाकुमारी बोहराले स्वास्थ्य सूचकांक कमजोर रहेको बताउँदै त्यसतर्फ गम्भीर ध्यान दिन आग्रह गरिन् ।

भगवती अधिकारीले बुटवल आसपासको खानेपानी समस्या समाधान गर्नुपर्ने बताइन् भने बसन्ती न्यौपानेले जलन उपचार केन्द्र स्थापना गर्न आग्रह गरिन् । भुवनेश्वर चौधरीले आत्मनिर्भर लुम्बिनी निर्माण सबैको साझा उद्देश्य भएको बताए । मिनाकुमारी श्रेष्ठले नयाँ नीति तथा कार्यक्रम बनाउने सन्दर्भमा समीक्षा गर्नुपर्ने भनाइ राखिन् । गिरिधारीलाल न्यौपानेले कार्यान्वयन योग्य योजना मात्रै अघि बढाउनुपर्ने धारणा राखे । लोककुमारी विश्वकर्माले जातजाति तथा भूगोलका विशेषता अनुसार बजेट बनाइनु पर्ने बताइन् । धर्मबहादुर चौधरीले लुम्बिनी प्राविधिक विश्वविद्यालयलाई प्रदेश गौरवको आयोजनाका रूपमा प्राथमिकता दिनुपर्ने माग गरे।प्रदेशसभाको आगामी बैठक जेठ २ गते शुक्रबार दिउँसो १ बजे बस्ने सभामुख तुलाराम घर्तीमगरले जानकारी गराएका छन् ।