खोज

बर्दिया,३१ बैशाख ।

बर्दियाको मधुवन नगरपालिकामा एक साता अघि साँझ परेको असिनापानीले डेढ करोड बराबरको खेतीवाली क्षति गरेपछि किसान मारमा परेका छन् । असिनाका कारण हिउँदे बाली, बसन्ते मकै र तरकारी खेतीमा पुर्ण क्षति पु¥याएको हो । प्राकृतिक विपत्तिले लाखौंको लगानीमा लगाइएका बाली पूर्ण रूपमा नष्ट भएपछि किसानहरू मारमा परेका छन् । तरकारी खेती र बसन्ते मकै खेतीमा करिब १ करोड ६० लाख रुपैयाँ बराबरको क्षति पु¥याएको प्रारम्भिक अनुमान गरिएको छ । मधुवन नगरपालिकाका वडा नं. ४, ५, ६, ८ र ९ मा गरी लगभग १ सय विगाहा खेतबारीमा लगाइएको काक्रो, फर्सी, बोडी, घिरौंला लगायतका लहरेवाली तथा बसन्ते मकै पूर्ण रूपमा क्षति पुगेको मधुवन नगरपालिका कृषि शाखाका प्रमुख एकराज वलीले बताए । असिनाले क्षति पुर्याएको तरकारी बाली र बसन्ते मकैमा उत्पादन शुन्य रहने गरी नष्ट भएको छ ।

असिनापानीले बसन्ते मकै, खुर्सानी ड्राईगन फ्रुटहरुमा पुर्ण क्षति पुर्याएको छ । लाखौ रुपैयाँ ऋृण लिएर गरिएको कृषि कर्ममा मौसम नत सरकारले नै साथ दिएको स्थानीय कृषक चित्रबहादुर लामिछानेले दुःखेसो पोखे । प्राकृतिक विपत्तिले न त रुन सकिएको छ, न त हाँस्न नै । कृषिमा भएको प्राकृतिक क्षतिले विदेश पलायन हुने अवस्था आउँन सक्ने स्थानीय अर्का कृषक सृजना चौधरी बताइन । ऋण तिर्न सकस हुने अवस्था आएको उनको भनाई छ ।

अविरल असिनाले लगाएको बाली नष्ट हुँदा साह्रै चित्त दुखेको स्थानीय कृषक धर्म प्रसाद पन्थ बताए । यस्तो विपतको समयमा समेत नगरपालिकाबाट किसानको घरदैलोमा कोही पनि सोधपुछका लागि न पुगेको भन्दै उनले दुःखेसो पोखे । बर्दिया जिल्ला अन्न भण्डारको रूपमा परिचित छ । तर अन्न उत्पादन गर्ने किसानहरू मारमा पर्दा दुखेसो सुनिदिने कोहि छैन । किसानहरुलाई राहत तथा क्षतिपूर्ति दिन तत्काल संघीय, प्रदेश र स्थानीय सरकारले पहल गर्नुपर्ने स्थानीय किसानको माग छ ।