खोज

बुटवल ।

विश्व शान्ति तथा आध्यात्म विज्ञान समाज नेपालले हरेक वर्षको बुद्ध जयन्ती वा कुनै पर्वको दिनलाई राष्ट्रिय ध्यान दिवसको रुपमा घोषणा गर्न सरकारसँग माग गरेको छ ।

पर्यटन तथा नागरिक उड्डयनमन्त्री बद्रीप्रसाद पाण्डेलाई ज्ञापन पत्र बुझाउँदै समाजले राष्ट्रिय ध्यान दिवस घोषणाको माग गरेको हो ।

नेपाल, भारत लगायत देशहरुको पहलमा २१ डिसेम्बरलाई संयुक्त राष्ट्रसंघद्वारा अन्तर्राष्ट्रिय ध्यान दिवसको रुपमा घोषणा भएको सन्दर्भ उल्लेख गर्दै समाजले बुद्ध जयन्तीलाई नेपालले राष्ट्रिय ध्यान दिवसको रुपमा घोषणा गर्नुपर्ने प्रस्ताव गरेको हो ।

“हाम्रो देश नेपाल आदियोगी शिवभूमिदेखि नाथ परम्परा हुँदै देव, क्रृषि एवं तपोभूमि, पुर्वीय दर्शन र गुरुकुलीय पद्धति आदिको अनुसरण र उपयोग गर्दै आएको प्राचीन ऐतिहासिक पृष्ठभूमि कायम रहेको छ”–ज्ञापनपत्रमा भनिएको छ–“विश्व शान्ति तथा आध्यात्म विज्ञान समाजले आजभन्दा चार वर्षअघि नै बुद्ध जयन्तीको अवसरलाई ध्यान दिवस घोषणाका लागि प्रस्ताव गरिएको र त्यसको नेतृत्व नेपालले लिओस् भनेर प्रस्ताव गरेका हौं ।”

समाजका संस्थापक योगी आचार्य राजन शर्माद्वारा हस्ताक्षरित ज्ञापनपत्रमा यिनै पृष्ठभूमि र वस्तुस्थितिका आधारमा राष्ट्रिय योग दिवस झैं बुद्ध जयन्तीको अवसर पारी वा अन्य कुनै उपयुक्त दिवसको चयन गरी राज्यका तर्फबाट घोषणा गर्न माग गरिएको छ ।