खोज

बुटवल —

प्रदेशसभामा सबैभन्दा कम उपस्थित हुने गरेकी जनमत पार्टीकी प्रदेशसभा सदस्य गीता गुरुङले बेलायतमा बसेर लुम्बिनी प्रदेशसभा सदस्य पदबाट राजीनामा दिएको जानकारी पठाएकी छन् ।

उनी २ महिनादेखि बेलायतमा बस्दै आएकी छन् । तर, मंगलबार उनले आफ्ना श्रीमान् कैलाश गुरुङमार्फत बेलायतबाटै हस्तलिखित राजीनामा पत्र लुम्बिनी प्रदेशसभाका सभामुख तुलाराम घर्तीसमक्ष पठाएकी हुन् । राजीनामा दिएको समाचार बाहिरिए पनि समाचार तयार पार्दासम्म सभामुखसमक्ष राजीनामापत्र पुगेको छैन । उनले अन्य विवरण भने सार्वजनिक गर्न खोजेनन् । राजनीतिमा आउनुअघि छोराछोरीसहित बेलायत बस्दै आएकी गीता रुपन्देहीको सिद्धार्थनगर नगरपालिका वडा नं ८ की स्थायीबासी हुन् ।

लुम्बिनी प्रदेशसभामा गुरुङ सबैभन्दा कम उपस्थित हुने प्रदेशसभा सदस्य हुन् । उनी चौथो अधिवेशनसम्मका ७३ बैठकमध्ये ३२ वटामा मात्र उपस्थित भएकी छन् । प्रदेशसभा सदस्य गुरुङ प्रदेशसभामा निर्वाचित भएपछि अहिले तेस्रो पटक २ अहिना अघि बेलायत पुगेकी हुन् ।

यसअघि पनि प्रदेश सभालाई जानकारी नगराई २ पटक बेलायत पुगेर फर्किएको पनि खुलेको छ । उनले सभामुखलाई सम्बोधन गर्दै मंगलबार पठाएको राजीनामा पत्रमा राष्ट्र, देश र जनताभन्दा माथि कोही हुँदैन भन्ने आफ्नो मान्यता रहेको उल्लेख गरेकी छन् । ‘म मेरो पदमा रही रहन उपयुक्त सम्झिएर जनताले तिरेको करबाट मैले पाउने पारिश्रमिक लिन उपयुक्त छैन,’ उनले राजीनामा पत्रमा लेखेकी छन्, ‘तसर्थ आजैका मितिबाट पदमुक्त हुन राजीनामा पेश गर्दछु ।’

तर, समाचार तयार पार्दासम्म पनि राजीनामा पत्र सभामुख घर्तीसमक्ष पुगेको छैन । सभामुख घर्ती र प्रदेशसभा सचिवालयका सचिव दुर्लभकुमार पुनले राजीनामाको विषयमा प्रदेशसभामा कुनै जानकारी नआएको बताए । ‘विदेश गएको भन्ने पनि प्रदेशसभालाई कुनै जानकारी छैन,’ उनले भने, ‘अब राजीनामा दिएकै भए सनाखत गर्न आफैं उपस्थित हुनुहोला नि त ।’

उनले आफ्नो सेवा र कार्यक्षमताप्रति आशा गरेर बसेका स्वाभिमानी जनता, आमाबुबा, दाजुभाइ, दिदीबहिनीलगायतका आशाका किरण स्वलुप्त भइरहेको आभाष आफूलाई भइरहेको पनि राजीनामा पत्रमा उल्लेख गरेकी छन् । ‘मप्रति कार्यक्षमताको आशा गरी बसेका मेरा स्वाभिमानी जनता आमाबुवा, दाइभाइ, दिदीबहिनीलगायतका आशाका किरण स्वलुप्त भइरहेको मलाई आभास भइरहेको छ,’ उनले लेखेकी छन्, ‘देश र जनताको पिर, मर्म मैले राम्ररी बुझेको छु । तसर्थ राष्ट्र, देश र जनताभन्दा माथि कोही हुँदैन भन्ने मेरो मान्यता हो ।’ उनी सीके रावत नेतृत्वको जनमत पार्टीबाट समानुपातिक कोटामा प्रदेशसभामा निर्वाचित भएकी थिइन् । उनका श्रीमान् कैलाश भने अहिले जनमत पार्टी छोडेर उपेन्द्र यादव नेतृत्वको जसपाका केन्द्रीय सदस्य बनेका छन् ।

जनमत पार्टीका लुम्बिनी प्रदेश संसदीय दलका नेता चन्द्रकेश गुप्ताले प्रदेशसभा सदस्य गुरुङ लामो समयदेखि पार्टीको सम्पर्कमा नरहेको र अहिले मोबाइल स्विच अफ गरेको बताए । ‘मैले पनि राजीनामा दिएको भन्ने हल्ला सुनेको छु,’ उनले भने, ‘तर, उहाँ माननीय (गीता गुरुङ) धेरै समयदेखि नै हाम्रो सम्पर्कमा हुनुहुन्थेन, मोबाइल पनि लामै समयदेखि अफ गर्नु भएको छ । मैले पनि प्रदेशसभातिर बुझ्दै छु ।’

लुम्बिनी प्रदेशसभामा पनि गुरुङ सबैभन्दा कम उपस्थित हुने प्रदेशसभा सदस्य हुन् । प्रदेशसभामा उपस्थित पनि नहुने, पार्टीको निर्णय पनि नमान्ने र सम्पर्कमा पनि नरहने गरेका कारण पार्टीमा पनि समस्या भइरहेको उनले बताए । ‘सभामुखज्यूसँग कुराकानी गरेर राजीनामा स्वीकृत गर्न लगाउँदै छौं,’ उनले भने, ‘पार्टीको विधि र विधानमा नबस्नेलाई पदमा राखिरहनु हुँदैन ।’

प्रदेशसभाका सचिव दुर्लभकुमार पुनले भने सभामुख र प्रदेशसभा सचिवालयमा अहिलेसम्म राजीनामा विषयमा कुनै जानकारी नआएको बताए ।

‘अहिलेसम्म सभामुखसमक्ष कसैको पनि राजीनामा आएको भन्ने विषय जानकारीमा छैन,’ उनले भने, ‘बाहिर सार्वजनिक भएको राजीनामा पत्र पनि संसदीय अभ्यासअनुसार सभामुखलाई सम्बोधन गर्न मिल्ने भाषामा देखिँदैन ।’ उनले राजीनामा पत्र प्राप्त भएको अवस्थामा सम्बन्धित प्रदेश सभा सदस्यले सभामुखसमक्ष प्रत्यक्ष सनाखत गरेपछि मात्र स्वीकृतिको प्रक्रियामा अघि बढ्ने बताए ।