खोज

चन्द्रौटा, २९ बैशाख ।

“हामी त यस्तो स्वास्थ्य सेवा गाउँमै पाउने कल्पना पनि गरेका थिएनौं”- स्थानीय सबान खातुन भन्छिन् । कपिलवस्तुको विजयनगर गाउँपालिका वडा नम्बर–५ की २९ वर्षीय उनको अनुहारमा खुसी थियो । कारण थियो–गाउँकै एक विद्यालयमा शनिबार आयोजना भएको निःशुल्क पाठेघर स्वास्थ्य जाँच शिविर, जसले उनलाई आफ्नै समस्याको पहिचान मात्र होइन, उपचारको ढोका समेत खोलिदियो ।

यस्तै अर्की स्थानीय ३६ वर्षीय निर्माला श्रीष लामो समयदेखि पाठेघर निरन्तर चेकजाँच गर्दै आएको बताईन् । उनले हर्ष व्यक्त गर्दै भनिन्- “म १२ बर्षदेखि चेकजाँचको फ्लोपमा छु, पाठेघरको समस्याले टाढा धाउने बाध्यता छ । अहिले जाने बेला भएको थियो गाउँमै जाँच गर्न पाउँदा अत्यन्तै हर्षित छु ।”

डालपुरस्थित शिव माध्यमिक विद्यालयमा पाठेघर सम्बन्धी विशेषज्ञ चिकित्सकद्धारा निःशुल्क स्वास्थ्य जाँच शिविर महिला सचेतनाले भरिएको थियो । समृद्धि सामुदायिक विकास सेवा केन्द्र, रुपन्देहीको सहजीकरणमा वडा कार्यालयले आयोजना गरेको एकदिने निःशुल्क शिविरले ८१ जना महिलाहरु लाभान्वित भएका छन् । शिविरमा परीक्षण गरिएका महिलामध्ये ७ जनामा आङ खस्ने समस्या देखिएको थियो, भने २ जनाको अवस्था जटिल देखिएकोले थप उपचारको सिफारिस गरिएको छ ।

वरिष्ठ स्त्री तथा प्रसूति रोग विशेषज्ञ डा. ज्योति रानाले शिविरमा पाठेघर खस्ने, तल्लो पेट दुख्ने, सेतो पानी बग्ने, ढाड दुख्ने जस्ता समस्या देखिएको बताईन् । “कम उमेरमा विवाह, सुत्केरीपछि पर्याप्त आराम नपाउनु, भारी बोक्नु र जनचेतनाको कमीले महिलाहरुमा यस्ता समस्या बढेका छन्,” डा. रानाले भनिन् । विशेषगरी ग्रामिण महिलाहरु रोग लुकाउने प्रवृत्तिमा रहने, बोल्न संकोच मान्ने, समयमै उपचार नपाउने हुँदा स–साना समस्याले जटिल रूप लिन सक्ने खतरा बढी हुने उनी बताउँछिन् ।

गाउँपालिका उपाध्यक्ष लक्ष्मी कुमारी चौधरीले पाठेघर स्वास्थ्य जाँच शिविरले ग्रामिणका महिलालाई निःशुल्क सेवा उपलब्ध गराउँदा अधिकांश महिला लाभान्वित हुनुको साथै जनचेतनाको समेत अभिवृद्धि हुने बताइन् । जनचेतनाका कमीले पाठेघरमा भएका समस्यालाई लुकाउने खोज्ने र समयमा उपचार नगराउँदा देखिएको समस्यालाई मध्यनजर गर्दै उनले स्वास्थ्य शिविरको प्रशांसा गरिन् ।

वडा नम्बर ५ का वडा अध्यक्ष अनवर मोहम्मद मुसलमानले वडावासी महिलालाई गाउँघरमै सेवा दिने उद्देश्यले स्वास्थ्य शिविरको आयोजना गरिएको बताए । पाठेघरको समस्या जटिल भएकोले क्यान्सर जस्तो भयानक रोगको पत्ता लगाउने र आङ खस्ने समस्याको समयमै उपचार गराउने सम्भावनालाई मध्यनजर गर्दै शिविर सञ्चालन गरिएको उनले बताए । स्वास्थ्य जाँच शिविरमा डा.ज्योति राना, डा. युवराज अधिकारी, डा. अनुपमा मरासिनी, स्वास्थ्यकर्मी लगायतको टोली शिविरमा खटिएको थियोे ।