खोज

दाङ,२९ बैशाख ।

अन्तर्राष्ट्रिय नर्सिङ दिवस दाङमा मनाइएको छ । सोही अवसरमा सहभागीले नर्सलाई नेपालमै आत्मनिर्भर हुने वतावरण हुनुपर्ने बताएका छन् । राप्ती स्वास्थ्य बिज्ञान प्रतिस्ठान दाङमा कार्यरत नर्सहरुले दुख गरी नर्स पढेर स्वदेशमा आत्मनिर्भर हुने वारवरण नहुँदा विदेश जान बाध्य भएको बताएका हुन् ।

प्रतिष्ठानमा कार्यरत ओटि डिपार्टमेन्ट नर्स कमला ओलीले विरामीलाई स्वस्थ बनाउनमा नर्सको भूमिका महत्तपूर्ण रहेको बताइन् । समुदायमा मात्रै होइन देशभरका नर्सले काम गरिरहेका छन् । नेपालमा काम गर्ने नर्सको संख्या कमी हुँदै आएकाले नर्सलाई नेपाल मै आत्मनिर्भर हुने वातावरण सरकारले गर्नुपर्ने बताइन् । ‘नर्स खुशी भएमा विरामीको राम्रो हेरचाह हुनसक्ने भएका कारण नर्स खुशी हुनु आवस्यक छ, ’उनले भनिन् । नर्सले लगानी गरेर पढाई पूरा गरेपछि उनीहरुले भने अनुसारको सेवा सुबिधा पाउनुपर्ने उनको माग छ । स्थानीय, प्रदेश र केन्द्रीय सरकारले नर्सलाई स्वदेशमै काम गर्ने वतावरणको सृजना गर्न आग्रह गरिन् ।नर्सिङ विद्यार्थी मौसमी बगाले आफू पीडामा भएपनि बिरामीको सेवामा लागिरहेका हुन्छौ, एउटा बिरामीसंग उभिएर काम गर्ने भनेको नर्स हो । नेपालमा राम्रो भविश्य नभएका कारण नर्स दिनदिनै विदेशीन बाध्य भएको बताइन् ।

विश्वभर फ्लोरेन्स नाइटिङ्गेलको जन्मदिनको अवरसरमा अन्तराष्ट्रिय नर्स दिवस मानउने गरिन्छ । विश्व स्वास्थ्य सङ्गठनले सेवा र समर्पणको प्रतीक मानिने नर्सहरूको सम्मान गर्न यो दिनलाई विश्व नर्स दिवसका रूपमा मनाउने निर्णय गरेको छ । नर्सिङ दोस्रो वर्षमा अध्ययनरत सोनि न्यौपानेले मेहनती र लगनशील पेशाकर्मीको रुपमा रहेको नर्सिङ बिना स्वास्थ्य सेवा अधुरो रहने बताइन् ।राप्ती स्वास्थ्य विज्ञान प्रतिष्ठानका उपकुलपति एवं रजिस्टार डा विकास लामिछानेले अन्तर्राष्ट्रिय नर्सिङ दिवस प्रत्येक वर्ष मे १२ तारिखको दिन मनाइने गरेको बताए । सन् १९७४ को जनावरीमा निर्णय गरी फ्लोरेन्स नाइटिङ्गेलको जन्मोत्सवको दिन अर्थात मे १२ तारिखलाई अन्तर्राष्ट्रिय नर्सिङ दिवसको रुपमा विश्वभर मनाउन थालिएको बताए । नर्सहरु आफ्नो काममा इमान्दारीताका साथ निरन्तर खटने भएका कारण स्वास्थ्य सेवामा सहज भएको बताए । स्वास्थ्यको मेरुदन्डको रुपमा रहेका नर्सहरुलाई सेवा सूविधा प्रदान गरेर स्वदेशमै काम गर्ने वातावरण सृजना गर्नुपर्ने बताए ।

प्रतिष्ठानका रेक्टर बसन्त लामिछानेले नर्सिङ हक हितको लागि सबै नर्स एकीकृत ढंगले आवाज उठाउनु पर्ने बताए । नर्सिङ प्राध्यापक इसु योगीले नर्सका महत्तपूर्ण समस्यालाई सरकारले सम्वोधन गर्नुपर्ने बताइन् । नर्स भनेका केयर गिभर मात्रै होइनन् । उनीहरुको क्षमताको कदर गर्नुपर्छ । नर्सिङ अध्ययनरत विद्यार्थी खुस्बु गुप्ता, आशिष चौधरी, खरनाकुमारी बिक, सोनि न्यौपाने लगाएतले कविता मार्फत नर्सिङ दिवसको शुभकामना दिएका थिए । प्रतिष्ठानका नर्सिङ प्रोफेसर अम्बिका पौडेलको अध्यक्षतामा कार्यक्रम भएको थियो । अन्तराष्ट्रिय नर्सिङ दिवसको यसपटकको नारा ‘हाम्रा नर्सहरू, हाम्रो भविष्य र नर्सहरूको हेरचाहले अर्थतन्त्रलाई बलियो बनाउँछ,’ भन्ने रहेको छ ।