खोज

काठमाडौँ, २९ वैशाख ।

राजस्व अनुसन्धान विभागले ध्रुव कन्स्ट्रक्सन प्रालिका सञ्चालक ध्रुव देवविरुद्ध एक अर्ब २१ करोड रुपैयाँ बराबरको कर छली गरेको आरोपमा मुद्दा दायर गरेको छ। काठमाडौँ नयाँ बानेश्वरस्थित ध्रुव कन्स्ट्रक्सन प्रालिको कार्यालयबाट संचालन भइरहेका कारोबारमा गम्भीर राजस्व अनियमितता भेटिएको भन्दै विभागले उच्च अदालत पाटनमा मुद्दा चलाएको हो।

विभागकी प्रवक्ता कृष्णकुमारी श्रेष्ठका अनुसार देवले वस्तु तथा सेवा वास्तवमै प्रदान नगरी केवल बिलबिजक जारी गरेको, खरिद रकम बैंकमार्फत भुक्तानी नगरेको, बिजकहरू क्रमअनुसार नजारी गरेको, र कर विवरणमा झुट्टा विवरण पेश गरेको पाइएको छ। साथै, मूल्य अभिवृद्धि कर र आयकरसम्बन्धी विवरण पनि नदिएको वा गलत रूपमा प्रस्तुत गरिएको विभागको आरोप छ।

प्रवक्ताका अनुसार देवले झन्डै ४६ करोड रुपैयाँ बराबरको मूल्य अभिवृद्धि कर र १४ करोड ६५ लाख रुपैयाँ बराबरको आयकर छली गरेका छन्। सोही आधारमा विभागले मूल्य अभिवृद्धि कर ऐन तथा आयकर ऐन उल्लंघन गरेको भन्दै देवविरुद्ध करिब १ अर्ब २१ करोड रुपैयाँ असुलउपरसहित जरिवाना र कैद सजायको माग गर्दै अभियोगपत्र दायर गरेको हो।

राजस्व चुहावट (अनुसन्धान तथा नियन्त्रण) ऐन, २०५२ को दफा २३ को उपदफा (१)(घ) बमोजिम देवमाथि बिगो बराबरको राजस्व असुल तथा त्यसको शतप्रतिशत जरिवाना सहित कानुनी कारबाहीको माग गरिएको छ।