खोज

गुल्मी, २७ वैशाख ।
गुल्मीको रेसुङ्गा विमानस्थलमा आइतबारदेखि साताको तीन पटक हवाई उडान हुने भएको छ । यस अघि बिहीबार मात्र उडान हुँदै आएकोमा अबदेखि नियमित रूपमा आईतबार, मंङ्गलबार र बिहीबारका लागि नेपाल वायुसेवा निगमद्वारा उडान थप गरिएको छ । नेपाल वायु सेवा निगम रेसुङ्गा विमानस्थल स्टेशन प्रमुख सुमन थापाले जानकारी दिएका छन ।
नेपाल वायुसेवा निगम (नेपाल एरलायन्स) सँग भएका दुई वटा ट्वीनअटर जहाज मर्मत भएसँगै रेसुङ्गा विमानस्थलमा उडान तालिका थप गरिएको हो । यस अघि सातामा एक पटक बिहीबार मात्र उडान हुँदै आएको थियो । वायुसेवा निगमको जहाज ग्राउन्डेड भएपछि जिल्लामा तीन महिना सवाई सेवा अबरुद्ध बनेको थियो ।

नेपाल वायुसेवा निगमले २०८० बैशाख २९ गतेदेखि गुल्मीमा व्यावसायिक रूपमा हवाई उडान शुरु गरेको थियो । निगमले जिल्लामा व्यावसायिक उडान गरेसँगै शुरुमा सातामा तीन पटकसम्म उडान गरेपनि पछि घटाएर सातामा एक पटक मात्र उडान गर्दै आईरहेको थियो । गुल्मीको रेसुङ्गा विमानस्थलमा नेपाल वायुसेवा निगमको १८ सिट क्षमताको ट्वीनअटर जहाजले काठमाण्डौबाट बिहान ६ः३० बजे र रेसुङ्गा विमानस्थलबाट बिहान ७:३० बजे उडान समय निर्धारण गरेको छ ।

निगमले काठमाडौंबाट गुल्मीका लागि ७ हजार पाँच सय रूपैंया र गुल्मीदेखि काठमाडौंका लागि ७ हजार तीन सय रूपैयाँ भाडादर निर्धारण गरेको छ । रेसुङ्गा विमानस्थलमा दिउसोको समयमा अत्याधिक हावाको चाँपका कारण प्राबिधिक दृष्टिकोणले बिहानको समयमा मात्र उडान गरिदै आएको छ । पछिल्लो समयमा गुल्मीमा हवाई उडान शुरु भएसँगै जिल्लामा आउने आन्तरिक एवं वाह्य पर्यटकहरूको संख्यामा समेत बृद्धि हुँदै गएको छ । जिल्लामा हवाई सेवा लिनका लागि यात्रुहरूको अत्याधिक चाप हुने गर्दछ ।