खोज

नेपालगञ्ज, २६ वैशाख ।

नेपालगञ्जका मुस्लिम समुदायका महिलाहरुले प्रजनन् स्वाथ्यका बारेमा जानकारी लिनुका साथै सेनेटरी प्याड बनाउन सिकिरहेका छन् । लुम्बिनी प्रदेशका सांसद मिना श्रेष्ठको संयोजनमा लुम्बिनी प्रदेश सरकार स्वास्थ्य मन्त्रालयको आर्थिक सहयोग, स्वास्थ्य कार्यालय बाँकेको आयोजना र नेपालगञ्ज उपमहानगरपालिका वडा नम्बर १ को समन्वयमा सञ्चालित मुस्लिम समुदायका महलिाहरुको लागि प्रजनन् स्वाथ्य तथा सेनेटरी प्याड बनाउने तालिमामा ९० जना महिलाले सहभागिता जनाएका हुन् ।

३०÷३० जनाको तीनवटा समूहमा विभाजन गरेर तालिम सञ्चालन गएिको छ । प्रत्येक तापलमको अवधी तीन दिन तोकिएको छ । ६० जना मुस्लिम महिलालाई प्रजनन् स्वाथ्य र ३० जनालाई सेनेटरी प्याड बनाउने तालिम दिईरहेको नेपालगञ्ज उपमहानगरपालिका १ नम्बर वडा कार्यालयले जनाएको छ । विहीबार देखि ३० जना मुस्लिम महिलाले सेनेटरी प्याड बनाउन सिकिरहेका छन् ।

मुस्लिम समुदायका महिलाहरूलाई स्वस्थ जीवनशैली र सेनेटरी प्याडबाट आत्मनिर्भर बनाउने उद्देश्यले तालिम सञ्चालन गरिएको लुम्बिनी प्रदेशका सांसद मिना श्रेष्ठले जानकारी दिइन् । उनले भनिन्, “तालिमबाट सँधै बुका भित्र रहेका मुस्लिम महिलाहरुले तालिमबाट प्रजनन् स्वाथ्यसँगै सेनेटरी प्याड बनाउन सिक्ने अपेक्षा लिएका छौं ।” मुस्लिम समुदायका महिलाहरूलाई आत्मनिर्भर बनाउन सेनेटरी प्याड बनाउने मात्र नभएर अन्य विषयमा पनि जानकार बनाउन आवश्यक रहेको सांसद श्रेष्ठको भनाइ छ । उनले तालिम सञ्चालन गर्नु अगाडि मुस्लिम समुदायका महिलाहरूको अपेक्षाबारे अध्ययन गरिएको बताइन् ।

नेपालगन्ज उपमहानगरपालिका वडा नम्बर १ का वडाध्यक्ष प्रमोद रिजालले प्रजनन स्वास्थ्यबारे सबै जानकार हुनैपर्ने विषय भएकाले यो विषयलाई समेटिएको बताए । उनले भने, “यो सबै समुदायका महिलाहरुको लागि आवश्यक विषय हो, तर मुस्लिम समुदायका महिलाहरु प्राय घर बाहिर ननिस्कने हुँदा उहाँहरुलाई प्राथमितामा पारेका हौं ।” आमामी दिनमा पनि यस्ता किसिमका तालिमहरु संचालन हुन आवश्यक रहेको उनले बताए ।

सेनेटरी प्याड बनाउने तालिमको सहजीकरण पुष्पा शर्माले गरिरहेकी छन् । १७ वर्षदेखि ३६ बर्ष उमेर समूहका महिलाहरूले सेनेटरी प्याड बनाउन सिकिरहेको उनले बताइन् । घरेलु सेनेटरी प्याडको प्रयोग गर्दा बचत हुनुका साथै वायु प्रदूषण पनि नहुने सहजकर्ता शर्माले बताइन् । उनका अनुसार एउटा प्याड कम्तीमा ४ महिनासम्म प्रयोग गर्न सकिन्छ । १ मिटर कपडाबाट ४ वटा प्याड बनाउन सकिने उनले बताइन् ।

यसैबिच प्रजनन् स्वाथ्य तालिममा १९ देखि ४० बर्ष उमेर समूहका किशोरी तथा महिलाहरुको सहभागिता छ । तालिमको सहजिकरण स्वास्थ्य कार्यालय बाँकेका मलेरीया निरीक्षक दुर्गा गौतम, पब्लिक हेल्थ नर्स बिष्णु श्रेष्ठ र नेपालगन्ज उपमहानगरपालिकाका वरिष्ठ अनमी निर्मला खनालले गरिरहेका छन् । तालिममा सहभागी किशोरी तथा महिलाहरुले प्रजनन् स्वाथ्यका बारेमा नबुझेको कुरा खुलेर सोध्ने गरेकोले उनीहरुलाई तालिम दिन सहज भइरहेको मलेरीया निरीक्षक दुर्गा गौतमले बताइन् ।