खोज

बुटवल, २६ वैशाख ।

बुटवलमा ट्रायम्फ मोटरसाईकलको बिक्री शुभारम्भ भएको छ । बुटवलका लागि आधिकारिक बिक्रेता बस्याल अटोमोवाइल्स प्रालिले दुई मोडलका ट्रायम्फ मोटरसाईकलको बिक्री शुक्रबारदेखि शुभारम्भ गरेको हो ।

यी मोटरसाईकल गएको भदौमा काठमाडौंको नाडा अटो शोमा नेपालका लागि आधिकारिक बिक्रेता हंशराज हुलाश चन्द एण्ड कम्पनीले सार्वजनिक गरेको थियो । बुटवलमा भने बस्याल अटोमोवाइल्स प्रालिले यी मोटरसाईकल भित्र्याएको हो ।

कम्पनीले ट्रायम्फ स्पीड ४०० र स्क्रयाम्बलर ४०० गरी दुई मोडलका मोटरसाइकल बिक्री शुभारम्भ गरेको कम्पनीका अध्यक्ष गोपाल प्रसाद बस्यालले जानकारी दिए ।

नेपाली बजारमा ट्रायम्फ स्पीड ४०० को मूल्य ६ लाख ३४ हजार ९०० रुपियाँ र स्क्रयाम्बलर ४०० एक्सको मूल्य ६ लाख ८९ हजार ९०० रुपियाँ रहेको छ ।

बजाजले भारतमा उत्पादन गरको ट्रायम्फ ४०० सिरिज भारतबाट विभिन्न ५० भन्दा धेरै देशहरूमा निर्यातसमेत सुरू भइसकेको छ । ट्रायम्फ ४०० सिरिजमा ३९८ सीसी क्षमताको लिक्वीड कुल्ड, फोर भल्भ, सिंगल सिलिन्डर इन्जिन छ । यो इन्जिनले ४० हर्षपावर तथा ३७.५ एनएम टर्क जेनेरेट गर्छ । दुवै मोटरसाइकलमा ६ स्पीड गियरबक्स जडान गरिएको छ । यी दुवै मोटरसाइकलमा समान फिचरहरू छन् । ट्रयाक्सन कन्ट्रोल, स्लीपर क्लच, राइड वाइ वायर जस्ता अत्याधुनिक फिचरहरू छन् ।

त्यसैगरी, ड्युल च्यानल एबीएस, मोनोसक सस्पेन्सन, सेमी डिजिटल इन्स्ट्रुमेन्ट क्लस्टर, यूएसबी टाइप सी चार्जिङ पोर्ट, एलईडी लाइट्स, हिटेड ग्रीप, गोल्ड यूएसडी फर्क र अलोय ह्वील जस्ता फिचर यी मोटरसाइकलमा छन् ।

बुटवलमा मोटरसाईकल लन्च गर्दै बुटवल उद्योग बाणिज्य संघका अध्यक्ष हरिप्रसाद अर्यालले मोटरसाईकल पारखीहरुका लागि यो सुरक्षित र भरपर्दो विकल्प रहेको बताए । ट्रायम्फ सिरिजको व्यावसायिक सफलताको कामना गर्दै उनले बिक्रीपछिको सेवा प्रदान गर्ने कुरामा पनि ध्यान दिन आग्रह गरे ।

नेपाल पत्रकार महासंघ रुपन्देहीका अध्यक्ष दिनेश पाण्डेले मोटरसाईकल खरीद गर्ने ग्राहकहरुका लागि सुरक्षित हेल्मेट प्रयोग गर्ने कुरामा कम्पनीले भूमिका खेल्नुपर्ने बताए । त्यस्तै कम्पनीका बिक्री प्रवन्धक सन्तोष थापा क्षेत्री र सञ्चालक केशव बस्यालले पनि मोटरसाईकलका विशेषताहरुका बारेमा जानकारी दिएका थिए ।