खोज

सुर्खेत,२६ वैशाख ।
कर्णाली प्रदेश सरकार आगामी आर्थिक वर्षको लागि बजेट निर्माणको काममा जुटेको छ । बजेट निर्माणका लागि सम्बन्धित निकाय, मन्त्रालयका सचिव तथा कर्मचारीहरू तथा सरोकारवाला निकायसँग बजेटका विभिन्न पक्षलाई लक्षित गर्दै छलफल तथा बहस भइरहेका छन् । कर्णाली सरकारले आगामी वर्ष बजेटको आकार बढाउने भएको छ । संघीय सरकारबाट बजेटको सिलिङ बढेर आएपछि प्रदेश सरकार पनि आकार बढाएर बजेट ल्याउने तयारीमा जुटेको हो ।

कर्णाली प्रदेशका आर्थिक मामिला तथा योजना मन्त्री राजिव विक्रम शाहले मन्त्रालयहरूलाई बजेट सिलिङ वितरण गरिसकेको बताए । ‘केही दिनअघि मात्रै हामीले मन्त्रालयलाई बजेट सिलिङ दिइसकेका छौँ,’ उनले भने, ‘मन्त्रालयहरूले पनि सोही अन्तर्गत काम गरिरहेका छन् भने हामीले पनि बजेटसँग सम्बन्धित विभिन्न विषयमा मन्त्रालयमा छलफल गरिरहेका छौँ । प्रदेश सरकारले चालु आर्थिक वर्ष (०८१/०८२) का लागि ३१ अर्ब ४१ करोड ४१ हजार बराबरको बजेट ल्याएको थियो । बजेट सिलिङ वितरणका आधारमा आगामी आर्थिक वर्षमा बजेटको आकार बढेर आउने अनुमान गरिएको शाहले बताए ।

यसैबीच ऋति फाउण्डेशनले बजेट निर्माण सम्बन्धी आयोजना गरेको छलफल कार्यक्रमका सहभागीहरुले कार्यान्वयनमुखी बजेट ल्याउन सुझाव दिएका छन् । मानवअधिकारकर्मी विन्दुलाल रेग्मीले नागरिकका आवश्यकतालाई ध्यानमा राखेर बजेट निर्माण गर्न सुझाव दिएका छन् । प्रदेश योजना आयोगका उपाध्यक्ष सूर्यनाथ योगीले दोस्रो पञ्चवर्षिय योजना अनुरुप नीति, कार्यक्रम तथा बजेट ल्याउन सुझाव दिएका छन् ।
त्यसैगरी कार्यक्रममा सहभागी अर्थ मन्त्री शाहले आगामी बजेटमा सरोकारवालाका सुझावहरु समावेश गर्ने प्रतिबद्धता जनाए । उनले भने, सरोकारवालाहरुबाट आएका सुझावहरूले बजेटको योजना र कार्यान्वयनमा सरकारलाई थप प्रभावकारी बनाउन मद्दत गर्ने बताए । उनले सबै पक्षबाट आएका सुझावलाई ग्रहण गरि बजेट निर्माण गरिने जनाए ।