खोज

काठमाडौं, २५ वैशाख ।

नेपाल राष्ट्र बैंक गभर्नर पद खाली रहँदै आएको विषय बिहीबारको प्रतिनिधिसभा बैठकमा गम्भीर रूपमा उठेको छ। नेपाली कांग्रेसका सांसद रामहरि खतिवडाले संसदमा सरकारको ध्यानाकर्षण गराउँदै तत्काल गभर्नर नियुक्तिको माग गरेका छन्। उनका अनुसार लामो समयदेखि बैंक नेतृत्वविहीन रहँदा आर्थिक निर्णय प्रक्रिया प्रभावित हुने मात्र होइन, अनावश्यक अड्कलबाजी र असमञ्जस पनि बढिरहेको छ।

खतिवडाले धितोपत्र बोर्डका अध्यक्षमाथि उठेका कमिसन मागिएको आरोपबारे सरकार स्पष्ट हुनुपर्ने बताए। “धितोपत्र बोर्डको अध्यक्षले आईपीओ स्वीकृतिका लागि कमिसन मागेको कुरा बाहिर आएको छ,” भन्दै उनले संसदमै सरकारसँग जवाफ मागे।

आफ्नो मन्तव्यको अर्को पाटोमा सांसद खतिवडाले अन्तर्राष्ट्रिय सुरक्षा अवस्थाबारे चिन्ता व्यक्त गरे। उनले रुस–युक्रेन, इजरायल–हमास र भारत–पाकिस्तानबीचका द्वन्द्व तथा चीन–ताइवान तनावले नेपालको अवस्थालाई थप जटिल बनाइरहेको भन्दै सरकारले सजग भएर सामना गर्नुपर्ने बताए। आतंकवादविरुद्धको लडाइँमा नेपालले कुनै पनि देशलाई साथ दिन तयार रहनुपर्ने धारणा व्यक्त गर्दै उनले यस्तो जटिल समयलाई गम्भीरतापूर्वक लिने आग्रह गरे।

उनको मन्तव्यले हालको आन्तरिक आर्थिक नेतृत्व रिक्तता र बदलिंदो अन्तर्राष्ट्रिय राजनीतिक सन्दर्भमा नेपालको भूमिकाबारे गहिरो सोच आवश्यक रहेको सन्देश दिएको छ।