खोज

नवलपरासी पश्चिम्, २४ वैशाख ।

बर्दघाट नगरपालिका वडा नम्बर ४ स्थित पारिजात वनक्षेत्रमा पर्या पर्यटन पार्क निर्माण अघि बढेको छ । पूर्वपश्चिम् राजमार्गको त्रिवेणी चोकबाट दक्षिणतर्फ रहेको झण्डै ९९ हेक्टर वनक्षेत्रमा पार्क निर्माणको काम भैरहेको हो ।

बर्दघाट नगरपालिकाले यसको बिगतमै डिपिआर गरी पार्क निर्माणका लागि ५२ करोड रुपैयाँको लागत मूल्यांकन गरेको छ ।

मनोरञ्जनका लागि प्राकृतिक वातावरणको स्पर्शमा आनन्द लिन आउनेहरू र प्रकृतिको अध्ययन अनुसन्धानका निम्ति पनि यो क्षेत्र निकै ठूलो सम्भावना बोकेको क्षेत्र हुन सक्ने यहाँका स्थानीय बताउँछन् । भौगौलिक बनावटले पनि राजमार्गतर्फ पहाड र समथर भागमा सिम क्षेत्र रहेको यहाँ निकै ठूलो जलाशय निर्माण गरी सिमसार सहितको अवधारणा अघि सारिएको छ ।

अहिले बर्दघाट नगरपालिका, पारिजात सामुदायिक वन र लुम्बिनी प्रदेश सरकारको ३० लाखको लगानीमा पार्कको सिमाङ्कन गरिएको क्षेत्रमा तारबार र पर्खाल लगाउनका निम्ति फाउन्डेशनको काम समेत भैरहेको छ । बर्दघाट नगरपालिकाका नगरप्रमुख शम्भुलाल श्रेष्ठले बर्दघाट नगरले अहिले विभिन्न प्राकृतिक स्थललाई पर्यटकीय क्षेत्रको रूपमा ब्रान्डिङ तथा विकास गरेर स्वदेशी पर्यटक आकर्षित गर्ने उद्देश्य अनुरुप अघि बढाएको बताए ।

“मानिसहरु अहिले कोलाहलपूर्ण वातावरण, ब्यस्त र तनावयुक्त जीवन बाँचिरहेका छन्, केही समय यसबाट मुक्ति पाउनका लागि समेत यो पर्या पर्यटन पार्क उत्कृष्ट गन्तव्यस्थल बन्छ भन्ने लाग्छ”– नगरप्रमुख श्रेष्ठले भने । स्थानीय तहले मात्रै लगानी गर्न सम्भव नभएको र यसका लागि प्रदेश र संघ सरकारमा पहल भैरहेको श्रेष्ठले बताए ।

स्थानीयको सहभागितामा पार्कको डाँडामा “गरे के हँुदैन” भन्ने अभियान सहित श्रमदान मार्फत गोरेटो निर्माण गरिएको छ भने डाँडाको माथिल्लो टुप्पो भागमा राष्ट्रिय झण्डा र नेपालको नक्सा अङ्कित आकारमा भौगोलिक चित्र तयार भैरहेको पारिजात वनका पुर्व अध्यक्ष चुडामणि भण्डारीले बताए । अहिले डाँडामा बसेर गफिन, मार्निङ वाक गर्न स्थानीयहरु पुग्ने गरेका छ्न । यहाँबाट बजार क्षेत्र, वरिपरिको वनजङ्गलको हरियाली सहितको मनमोहक दृश्य हेर्दा जो कोही पनि आनन्दित हुने गर्दछन् ।

बढ्दो जनघनत्व, फोहोरमैला उत्सर्जन र आम मानिसमा यसको महत्व बुझाउन नसक्दा प्रदुषित वातावरणले यस्ता क्षेत्रहरु संकटमा पर्दै आइरहेका छन् । अहिले उक्त पार्क निर्माण भैरहेको पारिजात वनक्षेत्रमा केही ट्रस्ट जस्ता सामान्य पूर्वाधार निर्माण भएको र खानेपानीको ब्यवस्थापन गरिएको पारिजात सामुदायिक वनका अध्यक्ष कमान सिंह थापाले बताए । हैसियत बिग्रेको वनक्षेत्रको समुचित प्रयोगसँगै यहाँको पर्यटन विकासमा यो पार्कले पूर्णता पाउन सके निकै ठूलो उपलब्धि हुने उनले बताए ।