खोज

काठमाडौँ ।

राष्ट्रपति रामचन्द्र पौडेलले संविधानको मर्मअनुसार आम नागरिकको स्वास्थ्यमा समान पहुँच सुनिश्चित गर्न र स्वास्थ्य सेवाको गुणस्तरमा सुधार ल्याउन सबैको ध्यान केन्द्रित हुनुपर्ने बताएका छन्। चिकित्सा विज्ञान राष्ट्रिय प्रतिष्ठान (न्याम्स) को २३औँ वार्षिकोत्सव समारोहमा बोल्दै उनले नेपाली संविधानले स्वास्थ्य र शिक्षा जस्ता आधारभूत अधिकारको प्रत्याभूति गरेको स्मरण गराउँदै, त्यसको व्यावहारिक कार्यान्वयन आवश्यक रहेको उल्लेख गरे।

राष्ट्रपतिले नेपालमै दक्ष र विज्ञ चिकित्सक उत्पादन हुनु सकारात्मक भए पनि डाक्टर बिदेसिने प्रवृत्ति चिन्ताजनक रहेको बताउँदै, यसलाई रोक्न राज्य र सम्बद्ध निकायले आवश्यक पहल गर्नुपर्ने धारणा राखे। साथै, प्रतिष्ठानले विगतदेखि नै विभिन्न वर्ग, तह र भौगोलिक क्षेत्रका नागरिकलाई गुणस्तरीय सेवा दिँदै आएकोमा उनले प्रशंसा व्यक्त गरे।

कार्यक्रममा राष्ट्रपति पौडेलले शिक्षण अस्पतालको रूपमा प्रतिष्ठानले नयाँ विधामा जनशक्ति उत्पादन गर्ने सम्भावनाप्रति विश्वास व्यक्त गर्दै नवप्रवर्तन र अनुसन्धानलाई अझ प्रोत्साहन गर्ने आश्वासन दिए। समारोहमा प्रा. डा. सुदीपकुमार भट्टाचार्यलाई सम्मान गरिएको थियो भने विभिन्न विधामा उत्कृष्ट अंक ल्याउने विद्यार्थीलाई नगद पुरस्कार र प्रमाणपत्र प्रदान गरिएको थियो।