खोज

बुटवल, २३ वैशाख ।

सूचनाको हकसम्बन्धी जनचेतना अभिवृद्धि गर्ने उद्देश्यले बुटवल उपमहानगरपालिका वडा नम्बर ३ मा एक विशेष अन्तक्र्रिया कार्यक्रम सम्पन्न भएको छ । वडा कार्यालयको सहकार्यमा पब्लिक भ्वाईस नेपालले आयोजना गरेको कार्यक्रममा सूचनाको प्रवाह, सेवाप्रवाह र पारदर्शिता कायम गर्न सूचनाको हक कसरी प्रयोग गर्न सकिन्छ भन्ने विषयमा विस्तृत छलफल गरिएको थियो ।

कार्यक्रमलाई सम्बोधन गर्दै वडा अध्यक्ष बिष्णु ढकालले वडामा सुशासन र पारदर्शिता कायम गर्न आफूहरू सधैं प्रतिबद्ध रहेको बताए। उनले वडा नम्बर ३ बुटवलका उत्कृष्ट वडामध्ये एक भएको उल्लेख गर्दै नागरिकले पाउने सेवामा कुनै कमी नरहेको दाबी गरे। “हामीले नागरिकले खोजेको सूचना समयमै उपलब्ध गराउँदै आएका छौं। वडामा हालसम्म लुकाउनु पर्ने कुनै काम गरिएको छैन। हामी पारदर्शिता कायम गर्न प्रतिबद्ध छौं,” उनले भने।

कार्यक्रममा वडा सचिव गणेश न्यौपानेले वडाबाट नागरिकले प्राप्त गर्ने सेवा र सूचनाको पहुँचबारे जानकारी दिएका थिए। उनले नागरिकले जन्म, मृत्यु, बसोबास, नाता प्रमाणपत्र, सिफारिस, सामाजिक सुरक्षा भत्ता लगायतका सेवा सहज रूपमा प्राप्त गर्दै आएको जानकारी गराए। साथै, सूचनाको प्रवाह पारदर्शी रहेको र नागरिकको जानकारीको अधिकारलाई वडाले सम्मान गर्दै आएको बताए।

पब्लिक भ्वाईस नेपालकी अध्यक्ष राधा बस्नेतले सूचनाको हक सम्बन्धी कानुनी प्रावधान, सूचना माग गर्ने प्रक्रिया र यसको प्रयोगले कसरी सुशासन र जवाफदेहिता प्रवद्र्धन गर्छ भन्ने विषयमा सहजीकरण गरेकि थिईन । उनले भनिन्, “सूचनाको हकको प्रभावकारी प्रयोगले भ्रष्टाचार न्यूनीकरणमा सहयोग पुग्छ र नागरिक सचेत तथा सशक्त बन्छन्।”

कार्यक्रममा सोही वडाका निर्वाचित सदस्यहरू, टोल विकास संस्था, बाल संजाल, युवा संजाल, आमा समूह, एकल महिला समूह, अपाङ्गता, जेष्ठ नागरिक मंचलगायत विभिन्न संघसंस्थाका प्रतिनिधिहरूको उल्लेखनीय उपस्थिति थियो। सहभागीहरूले यस्ता जनचेतनामूलक अन्तक्र्रिया कार्यक्रमलाई निरन्तरता दिनु आवश्यक रहेको विचार व्यक्त गरे। उनीहरूले सूचनाको हकको प्रभावकारी प्रयोगले भ्रष्टाचारमुक्त समाज निर्माणमा सकारात्मक योगदान पुर्याउन सक्ने विश्वास व्यक्त गरेका थिए।