खोज

कपिलवस्तु, २३ बैशाख ।
नेपाल बाल संगठन कपिलवस्तुको सभापतिमा पुनः गोपालमणी ज्ञवाली निर्विरोध निर्वाचित भएका छन् । कपिलवस्तु बाल गृह तौलिहवामा आयोजित नेपाल बाल संगठन कपिलवस्तुको जिल्ला सभा तथा अधिवेशनले चार बर्षे कार्यअवधिका लागी ज्ञवालीको नेतृत्वमा ८ सदस्यीय जिल्ला कार्य समिति निर्विरोध निर्वाचित गरेको हो । ज्ञवाली सभापतित्वको समिति सदस्यहरुमा श्याम प्रकाश प्रजापती, मोहम्मद वसिम मुसलमान, कृष्ण सापकोटा, प्रेमकला थापा (रेणु), निर्मला न्यौपाने, धिरज कुमार गुप्ता र राम भजन कलवार निर्विरोध निर्वाचित भएको निर्वाचन अधिकृत जीवनाथ मरासिनीले जानकारी दिए । निर्वाचित समितिको पहिलो बैठकले अध्यक्षको प्रस्तावमा २ जना सदस्य मनोनयन गर्नेछ । सो पश्चात समिति बैठकले उपसभापति, सचिव र कोषाध्यक्ष चयन गर्ने जनाइएको छ । सभापति पदमा पुनः निर्विरोध निर्वाचित ज्ञवालीले नेपाल बाल संगठन कपिलवस्तुलाई श्रोतयुक्त बनाउन आवश्यक रहेको अत्याधुनिक छात्रावास निर्माणको कार्यलाई प्राथमिकतामा राखेको बताए ।

यस अघि आयोजित उद्घाटन सत्रको कार्यक्रममा बोल्दै नेपाल बाल संगठनकी कन्द्रीय अध्यक्ष बिद्या उपाध्याय न्यौपानेले बालबालिकालाई आफ्नो मौलिकता र सभ्यतासँग जोड्न सक्नु पर्ने बताइन । बालबालिका सुरक्षित रहे देश सुरक्षित रहने उनको भनाई थियो । वर्तमान समितिले रचनात्मक कार्यहरु गरेको भन्दै जिल्ला समन्वय समिति कपिलवस्तुका प्रमुख बाबुराम आचार्यले प्रशंसा गरे । आफुले सदैव बाल गृहका लागि सकारात्मक सहयोग गर्दै आएको जनाउदै बाल गृहका लागि आवश्यक देखिएको छात्रावास निर्माणमा पहलकदमीका लागी सबैको सहयोग आवश्यक रहेको पुर्व प्रदेश राज्य मन्त्री रिना बिकले बताइन ।

बाल गृहको समितिले श्रोत साधनको व्यवस्थापन गरि बालकहरूको भविष्य निर्माणका लागी निरन्तर खटिने कार्य प्रशंसनीय रहेको कपिलवस्तुका प्रमुख जिल्ला अधिकारी दिल कुमार तामाङ्गले बताए । सो अवसरमा नेपाल बाल संगठन जिल्ला कार्य समिति कपिलवस्तुका सचिव श्याम प्रकाश प्रजापतिले प्रगती प्रतिवेदन प्रस्तुत गरेका थिए । त्यसै गरि कोषाध्यक्ष मोहम्मद वसिम मुसलमानले गत आर्थिक वर्ष २०८०/८१ को १ करोड ४ लाख ७ हजार १ सय २२ रुपैयाँ बराबरको र चालु आवको माघ मसान्तसम्मको ५८ लाख ७८ हजार ३ सय ४१ रुपैया बराबरको आय व्यय विवरण प्रस्तुत गरे । बाल गृहको स्थायित्वका लागि दिगो श्रोत व्यवस्थापनमा पहलकदमी आवश्यक रहेकोमा केन्द्रीय सदस्य साजन भण्डारी, संगठनका जिल्ला उपाध्यक्ष श्यामलाल सुवेदी, तौलिहवा उद्योग वाणिज्य संघका अध्यक्ष गयादीन कुर्मी, नेपाल पत्रकार महासंघका कार्यवाहक शाखा अध्यक्ष खग प्रसाद चापागाई लगायतले जोड् दिए ।