काठमाडौं।
अमेरिकाका पूर्व राष्ट्रपति डोनाल्ड ट्रम्पको प्रशासनद्वारा शरणार्थी प्रवेशमा लगाइएको रोकको विरुद्धमा अमेरिकी संघीय अदालतले ठूलो निर्णय सुनाउँदै झन्डै १२ हजार शरणार्थीलाई अमेरिका प्रवेश गराउन आदेश दिएको छ। सोमबार अमेरिकी जिल्ला न्यायाधीश जमाल ह्वाइटहेडले यो आदेश जारी गर्दै ट्रम्प प्रशासनको दाबीलाई स्पष्ट रूपमा अस्वीकार गरेका हुन्।
न्यायाधीश ह्वाइटहेडले ट्रम्प प्रशासनले शरणार्थी प्रवेश रोक्न ल्याएको कार्यकारी आदेशको व्याख्या “बेइमान र भ्रामक” रहेको टिप्पणी गर्दै भने, “सरकारको तर्कले केवल अपील अदालतको निर्णयको रेखामात्र होइन, नभएको ठाउँमा नयाँ पाठसमेत देख्न खोजेको छ।”
ट्रम्प प्रशासनले जनवरीमा शरणार्थी प्रवेश प्रणाली निलम्बन गरेको थियो। त्यसपछिको सुनुवाइमा सरकार पक्षले १ सय ६० जना शरणार्थीलाई मात्र अनुमति दिनुपर्ने तर्क गरेको थियो। तर अदालतले सो तर्कलाई खारेज गर्दै पहिले नै स्वीकृत भिसा र यात्रा योजनासहितका सबै शरणार्थीलाई प्रवेश दिनुपर्ने ठहर गरेको हो।
यो मुद्दा यहुदी शरणार्थी संस्था एचआइएएस, ख्रीष्टियन समूह चर्च वर्ल्ड सर्भिस, लुथरन कम्युनिटी सर्भिसेस नर्थवेस्ट लगायतका संस्थाहरूले दायर गरेका थिए। उनीहरूले ट्रम्पको आदेशले धेरै मानिसको जीवन अस्तव्यस्त बनाएको जनाउँदै कानुनी लडाइँ थालेका थिए।
पूर्व राष्ट्रपति जो बाइडेनको प्रशासनले शरणार्थी कार्यक्रमलाई पुनः सक्रिय गर्दै जलवायु परिवर्तनजस्ता कारणले विस्थापित व्यक्तिहरूलाई समेत समावेश गर्न नीतिगत विस्तार गरेको थियो। तर ट्रम्पको कार्यकालमा आप्रवासीहरूविरुद्ध कठोर नीति, निर्वासन कार्यक्रम, र हातकडी लगाएर सामूहिक निर्वासन जस्ता कदमहरू अगाडि सारिएको थियो।
न्यायाधीशको यो आदेशले ट्रम्प प्रशासनको आप्रवासन नीतिविरुद्धको कानुनी संघर्षमा एक महत्वपूर्ण मोड ल्याएको छ।
