नेपालगञ्ज, १९ बैशाख
बाँकेको राप्तीसोनारी गाउँपालिकास्थित राप्ती नदीमा डुबेर एक बालकको मृत्यु भएको छ । शुक्करबार दिउँसो करिब १२ बजे राप्ती नदीमा पौडी खेल्न गएका राप्ती सोनारी गाउँपालिका–३ बैंसा निवासी यज्ञबहादुर विकको कान्छो छोरा १३ वर्षिय सफर विकको डुबेर मृत्यु भएको हो । ईलाका प्रहरी कार्यालय बैजापुर बाँकेले दिएको जानकारीअनुसार आफ्नो एक जना साथीसँग शुक्रबार दिउँसो नदीमा पौडी खेल्ने क्रममा सफर एक्कासी डुबेको र साथिले बचाउन चाहेपनि नसकोको बताईएको छ । इलाका प्रहरी कार्यालय बैजापुरका प्रहरी प्रमुख बालबहादुर घर्ति मगरले करिब १२ बजे सफर विक अगैया र गोबारपुरको बीच भागमा, राप्ती नदीमा डुबेको खबर पाएलगत्तै प्रहरी टोली घटनास्थलमा पुगेको जनाउँदै प्रहरी र स्थानीयले विकलाई खोजतलास गर्दा दिउँसो १ बजे शव फेला परेको जानकारी दिनुभयो ।
बालकको शवलाई पोस्टमार्टमका लागि नेपालगन्जस्थित भेरी अस्पतालमा पठाइएको जनाउँदै पोस्टमार्टमपछि आफन्तको जिम्मा लगाउने प्रहरीले जनाएको छ । मृतक वालक सरस्वती माध्यमिक विद्यालय राप्ती सोनारी ३ भवनियापुरमा अध्ययनरत विद्यार्थी हुन् । गर्मीको समयमा जिल्लामा रहेका विभिन्न नदी, खोला, ताल तलैया र अन्य पानी जमेको स्थानमा बालबालिका पौडी खेल्न जाने बढी सम्भावना रहेकाले एक्लै त्यस्ता स्थानमा जान नदिन जिल्ला प्रहरी कार्यालय बाँकेले सार्वजनिक अपिल गरेको छ ।
२० मंसिर २०८२, शनिबार
