खोज

गुल्मी, १९ वैशाख ।

गुल्मीमा डेढ करोड बढी लगानीको हाटबजार अहिले सवारी पार्किङ र विद्युतका पोल राख्नेमा परिणत भएको छ । सदरमुकाम तम्घासस्थित चारीखोलामा रेसुंगा नगरपालिकाले सञ्चालनमा ल्याएको हाटबजार सवारी साधन र विद्युतका पोल राख्ने कार्यमा परिणत भएको हो ।

साविकको जिल्ला विकास समिति, कृषि कार्यालय र पशुसेवा कार्यालयका साथै नगरपालिकाको गरी कुल डेढ करोड बढी लगानी रहेको हाटबजार उद्देश्य अनुसार प्रयोग नभइ गाडी पार्किङको रुपमा परिणत भएको छ । उक्त स्थानमा केही वर्ष पहिले कृषकले उत्पादन गरेका कृषि उपजहरुलाई नगरपालिकाले नै खरिद गरी बिक्री गर्ने गरेको थियो । पछि ब्यक्तिलाई हाटबजार सञ्चालनको जिम्मा दिएपनि धेरै समय टिक्न सकेन र अहिले सवारी साधन पार्किङको रुपमा हाटबजार रहेको छ ।

निजी क्षेत्रले हाटबजारलाई सञ्चालन गर्न नसकेकाले हाटबजारलाई नगरले ब्यवस्थित गर्न लागेको नगरप्रमुख खिलध्वज पन्थीले बताए । विगत केही महिनादेखि हाटबजार सञ्चालनमा नआएको बताउँदै उक्त स्थानमा सुविधा सम्पन्न दुई तले भवन निर्माण गर्न लागेकाले भवन निर्माण पश्चात व्यवस्थित गरी नगरले हाटबजार सञ्चालनमा ल्याउने पन्थीको दाबी छ । यसै आर्थिक वर्षभित्रमा भवन सम्पन्न हुने भएकाले त्यस पश्चात नवनिर्मित भवनमा नयाँ ब्यवस्थापनका साथ हाटबजार सञ्चालनमा ल्याएरै छाडने उनको भनाइ छ ।

जिल्ला समन्वय समिति गुल्मीको नाममा रहेको उक्त जग्गा ११ बर्षका लागि नगरपालिकाले भोगचलन गर्न पाउने गरी जिल्ला समन्वय समिति र नगरबीच सम्झौता भएको हो । आपसी समझदारीमा अवधि थप गर्न सक्नेसमेत सम्झौता पत्रमा उल्लेख गरिएको छ ।
प्रत्येक आर्थिक वर्ष सम्पन्न भएको तीन महिना भित्र हाटबजारको आयब्यय विवरण जिल्ला समन्वयलाई बुझाउनुपर्नेछ । प्रतिवेदनका आधारमा नाफा भए नाफाको २५ प्रतिशत नगरपालिकाले समन्वयलाई बुझाउन पर्ने सम्झौतामा उल्लेख गरिएको छ ।
नगरपालिकाले सञ्चालनमा ल्याएको हाटबजार । तस्बिर ः तिलाचन पाण्डे