खोज

बुटवल, १९ बैशाख ।

कराते खेलाडीहरुको क्षमता अभिवृद्धि गर्ने उदेश्यका साथ बुटवलमा पहिलोपटक अन्तराष्ट्रियस्तरको काता सेमिनार संचालन भएको छ । नेपाल सितोरियो कराते संघ रुपन्देहीको आयोजनामा तीन दिने काता सेमिनार विहिबारदेखी शुरु भएको हो ।

कराते खेलाडीहरुमा सितोरियो कराते सङ्घ, रुपन्देहीका अध्यक्ष नारायण थापाले अन्य खेलको तुलनामा कराते खेलको आकर्षण बढि रहने भन्दै आत्मरक्षाका हिसाबबाट समेत सबैभन्दा बढि महत्वपूर्ण भएको बताए । ‘केवल फाईटमात्र नभई कातामा पावर ल्याउने, मोभमेन्ट बढाउने र विश्व कराते फेडेरेसनमा गरिने काता सिक्न तालिम फलदायी हुनेछ । ’–उनले भने । वरिष्ठ प्रशिक्षक हिरा सिंह डंगोलले खेलाडीहरुलाई ३ दिनसम्म हाल प्रचलनमा रहेको काता र अन्तराष्ट्रियस्तरमा खेलाडी सहभागी हुदा प्रस्तुत गर्ने काताका बारेमा ब्यवहारिक ज्ञान दिने उनले बताए ।

एक समारोहका बिच बुटवल उप–महानगरपालिकाका प्रमुख खेलराज पाण्डेयले उद्घाटन गर्दै आफू युवावस्थामा कराते खेलेको स्मरण गर्दै यो खेल ब्यक्तिको शारीरिक, मानसिक विकास र अनुशासित सिकाउने उपयुक्त भएको बताए । हरेक खेलको विकास र प्रवद्र्धनमा आफु निरन्तर लाग्ने उनले प्रतिबद्धता जनाए ।

कार्यक्रममा वरिष्ठ प्रशिक्षक हिरा सिंह डंगोलले प्रशिक्षार्थीहरु सेमिनारमा प्राप्त सीप र ज्ञानलाई दैनिक अभ्यासमा ल्याउन आग्रह गरे । विगतमा आफूले प्रशिक्षण लिँदा भोगेका अनुभवहरू सुनाउँदै अहिलेको कराते प्रशिक्षण प्रविधिमा आएको व्यापक सुधार र रूपान्तरणको चर्चा गरे ।

कार्यक्रममा नगर खेलकुद विकास समिति संयोजक बोनिन पिया, दीप बोर्डिङ स्कुलका अध्यक्ष टिकाराम न्यौपाने, विष्णु धराल, भरत केसी, सुरेन्द्र शाक्य, शंकर पाण्डे, लोकतान्त्रिक खेलकुद संघका केन्द्रीय सदस्य ऋषिराम पौडेलले सेमिनारको सफलताको शुभकामना दिए ।

यसैबिच कराते खेलको विकासमा योगदान दिएका प्रशिक्षक ऋषिराम पौडेल र बुद्ध महर्जनलाई सम्मान गरिएको थियो ।
कार्यक्रमको संयोजक तथा कराते प्रशिक्षक उमेश थापाले रुपन्देहीका खेलाडीहरु पहिलोपटक आयोजना गरिएको सेमिनारमा नवलपरासीका समेत खेलाडी समावेश भएको बताए । अन्तराष्ट्रिय प्रतियोगितामा भाग लिन यो तालिम आवश्यक हुने उनले बताए । सेमिनारमा ८० बढी सिनियर खेलाडीहरु सहभागी रहेका थिए ।