खोज

काठमाण्डौ, १९ बैशाख ।
मदन भण्डारी रोड रेस च्याम्पियनशिप २०८२ मा १० किलोमिटर खुल्ला दौडमा पुरुषतर्फ मुकेश पाल प्रथम भएका छन् । प्रतियोगितामा राजन रोकाय दोश्रो र शुशिल शाही तृतीय भए । १० किलो मिटरकै महिलातर्फ भने पूर्णलक्ष्मी न्यौपाने प्रथम, निर्मल केसी दोश्रो र सिर्जना पाण्डे तेश्रो भए । मदन भण्डारी स्पोर्टस एकेडेमीको आयोजनामा काठमाडौमा सम्पन्न बृहद रोड रेस प्रतिगोगितामा १८ बर्षमुनिको ५ किलोमिटर दौडको छात्रतर्फ बादल कार्की प्रथम, कृष्ण परियार दोश्रो र अमृत बिश्वकर्मा तेश्रो भए । ५ किलोमिटरकै छात्रातर्फ अस्मिता भुजेल प्रथम, भगवती खड्का दोश्रो र शर्मिला बिक तेश्रो भए ।
खुल्लातर्फ प्रथम, दोश्रो र तेश्रोलाई क्रमशः ५०, ३०, २० हजार तथा १८ बर्षमुनितर्फ प्रथम, दोश्रो र तेश्रोलाई क्रमशः २०, १५, १० हजार रूपैया रूपैया नगद, शिल्ड र प्रमाणपत्रसहित पुरस्कृत गरिएको थियो । खुल्लातर्फ उत्कृष्ट पाँच र १८ बर्षमुनिकातर्फ उत्कृष्ट दशलाई पनि नगदसहित पुरस्कृत गरिएको थियो ।

दशरथ रंगशालाबाट सुरु भएको दौड राजधानीका विभिन्न भाग परिक्रमा गरी रंगशालामै पुगेर समापन भएको थियो । प्रतियोगितामा सात हजारभन्दा बढि जनाले भाग लिएका थिए । प्रतियोगिताको उद्घाटन कार्यक्रममा युवा तथा खेलकुद मन्त्री तेजुलाल चौधरीले खेलकुदको विकासबाट सबै पक्षमा सकारात्मक योगदान पुग्ने बताए । कार्यक्रममा एकेडेमीका अध्यक्ष तथा राष्ट्रिय खेलकुद परिषदका उपाध्यक्ष ध्रुव आचार्य, कार्यक्रम संयोजक तथा एकेडेमीका बागमती अध्यक्ष राम केसी, कर्णाली प्रदेशका आर्थिक मामिला तथा योजना मन्त्री तथा नेपाल एथलेटिकक्स संघका संयोजक राजिब बिक्रम शाह, एकेडेमीका उपमहासचिब सुवर्ण श्रेष्ठ, सचिव कृष्ण तिमिल्सिना, राखेपका बोर्ड सदस्य जगत धामी, प्याप्सन काठमाडौका अध्यक्ष नवराज भट्ट लगायतले विजेता खेलाडीहरूलाई पुरस्कार वितरण गरे । एकेडेमीका अध्यक्ष आचार्यका अनुसार एकेडेमीद्वारा सञ्चालित रोड रेसको यो तेश्रो संस्करण हो । लगत्तै हरेक प्रदेशमा यस्तै प्रतियोगिता आयोजना हुँदैछन् ।