खोज

विराटनगर  ।
प्रधानमन्त्री केपी शर्मा ओलीले नेपालमा प्रतिगमन (लोकतान्त्रिक व्यवस्थाबाट फर्कने प्रयास) सफल हुने कुनै सम्भावना नरहेको बताएका छन्। विराटनगरमा आयोजित कोशी लगानी सम्मेलन उद्घाटन गर्दै प्रधानमन्त्री ओलीले केही विस्थापित तत्वहरू पुनः सत्तामा फर्किने प्रयासमा लागेको उल्लेख गरे तर ती प्रयास विफल हुने स्पष्ट पारे।

प्रधानमन्त्री ओलीले भने, “नेपालमा संघीयता र गणतन्त्र आएको धेरै भएको छैन। त्यसैले प्रतिगमनका प्रयास हुनु कुनै नौलो कुरा होइन। यस्तो प्रयास त संसारभर नै भइरहेका हुन्छन्, तर नेपालमा त्यसको सफलता असम्भव छ।”

उनले गत चैत १५ गतेको घटनालाई उदाहरण दिँदै प्रतिगमनकारी सोच अब समाप्त भइसकेको बताए। ओलीले कलाकार प्रकाश सपूत र सुरक्षा पन्तमाथि भएको व्यवहारलाई अधिनायकवादी प्रवृत्तिको उदाहरणका रूपमा प्रस्तुत गरे।

“एक जना कलाकारले अर्को व्यक्तिबारे सकारात्मक टिप्पणी गरेपछि उनकै चलचित्र बहिष्कार गर्न उक्साइएको छ। यस्ता असहिष्णु व्यवहार प्रतिगमनकारी सोचको प्रतिनिधि हो,” ओलीले भने।

प्रधानमन्त्री ओलीले देशमा अहिले कानून र सुव्यवस्थाको अवस्था राम्रो रहेको र लगानीका लागि अनुकूल वातावरण बनेको दाबी गरे। उनले भने, “सडक तथा हवाई पूर्वाधार सुदृढ भइरहेका छन्। छिट्टै कोशीदेखि गंगासम्म जलमार्ग पनि सञ्चालनमा ल्याइनेछ।”

उनले लगानीकर्तालाई ढुक्क भएर नेपालमा लगानी गर्न आग्रह गर्दै देश समृद्धिको दिशामा अघि बढिरहेको बताए।