खोज

काठमाडौँ ।

सर्वोच्च अदालतले अनधिकृत पत्र लेखेको आरोपमा शाखा अधिकृत महिमानसिंह विष्टमाथि कारबाही थालेको छ।

बुधबार विज्ञप्ति प्रकाशित गरी सर्वोच्च प्रशासनले ‘अनधिकृत रुपमा सो पत्र लेख्ने अधिकृतलाई कानुन बमोजिमको कारबाहीको प्रकृया सुरु गरिएको’ स्पष्ट पारेको छ।

सर्वोच्चका प्रवक्ता सह रजिस्ट्रार अच्युत कुईंकेलद्वारा जारी विज्ञप्तिमा भनिएको छ, ‘यस अदालतको शाखा अधिकृतले च.नं. १९२७७ मिति २०७२।०१।१७ को श्री कारागार कार्यालय डिल्लीबजार काठमाडौँलाई लेखिएको पत्र अनधिकृत रहेकोले उक्त माथि उल्लेखित च.नं. र मितिको अनुरोध पत्र कार्यान्वयन नगर्न अनुरोध गर्दै सम्बन्धित निकायमा पत्राचार गरिसकिएको र अनधिकृत रुपमा सो पत्र लेख्ने अधिकृतलाई कानून बमोजिमको कारबाहीको प्रकृया सुरु गरिएको बेहोरा सबैमा जानकारीको लागि अनुरोध छ।’

बुधबार अदालतका शाखा अधिकृत महिमानसिंह विष्टले नागरिक उन्मुक्ति पार्टीका संरक्षक रेशम चौधरीलाई पक्राउ गर्न डिल्लीबजार कारागार शाखालाई पत्र लेखेपछि उनी पक्राउ परेका थिए।

लगत्तै सर्वोच्चले अनधिकृत पत्र लेखेको भन्दै शाखा अधिकृत विष्टमाथि छानबिन थालेको थियो। उनी पक्राउ परिसकेका छन्।

सर्वोच्चले रेशमलाई तत्काल थुनामुक्त गर्न भन्दै डिल्लीबजार कारागारलाई पत्र समेत पठाइसकेको छ ।