खोज

बुटवल, १५ बैशाख ।
रुपन्देही ईभेन्ट्स ब्यवसायी संघले नया वर्ष २०८२ को क्यालेण्डर बिमोचन तथा शुभकामना आदानप्रदान कार्यक्रम गरेको छ । सोमबार एक कार्यक्रमका बिच संघको सचिवालयमा बुटवल उपमहानगरपालिका वडा नं ८ का वडाअध्यक्ष यज्ञ प्रसाद पंगेनी, लुम्बिनी निर्माण ब्यवसायी संघ बुटवल शाखाका अध्यक्ष बुद्घिराज थापा, संघका अध्यक्ष किरण कुमार श्रेष्ठ, संघका उपाध्यक्ष मोहमद ईरसादले सामुहिक रुपमा क्यालेण्डर बिमोचन गरे ।

कार्यक्रममा बुटवल उपमहानगरपालिका वडा नं ८ का वडाअध्यक्ष यज्ञ प्रसाद पंगेनीले ब्यवसायीहरु सधै एकतावद्घ हुन आग्रह गर्दै आम उपभोक्तालाई सहज हुने दर रेट तोक्न समेत ब्यवसायीहरुलाई आग्रह गरे । आर्थिक समस्यामा रहेको बेला थोरै मुनाफा लिने र ब्यापार गर्ने विधि अप्नाउन उनले सुझाव दिदै ब्यवसायीहरुको बिमा गर्ने विषयमा गम्भिर भएर लाग्नुपर्ने बताए । स्थानिय सरकारबाट पाउने धेरै सेवा सुविधाबारे जानकारी नहुदा आम नागरिकहरु बन्चित भईरहेको उदाहरण दिदै उनले यसबारेमा सजग बन्न समेत आग्रह गरे ।

कार्यक्रममा लुम्बिनी निर्माण ब्यवसायी संघ बुटवल शाखाका अध्यक्ष बुद्घिराज थापाले विगतका दिनमा ओझेलमा परेको ब्यवसायीहरुलाई गोलबद्घ गरि समुदायमा पहिचान दिने सफल भएको बताए। समुहमा नै बल हुने भन्दै उनले एकतालाई निरन्तरता दिन आग्रह गरे ।

यसैबिच क्यालेण्डर प्रकाशनमा सहयोग गर्ने संगम टेन्टका संचालक अफरोज अहमद, सल्लाहकार सुनिल हलुवाई, ब्यवसायीहरु ललिल तिरुवा, संघका सचिव दुर्गेश गुप्ता, सहसचिव बसिम अहमदले ब्यवसायीहरुका सामान्य देखी नीतिगत समस्याको विषयमा संस्थाको पहल महत्वपूर्ण रहेको भन्दै नया वर्षमा नया योजनाहरु बनाउने बताए ।

कार्यक्रममा संघका अध्यक्ष किरण कुमार श्रेष्ठले ब्यवसायीहरुलाई गोलबद्घ गरि संस्थागत हकहितमा अग्रसर गराउन सफल भएको बताउदै यसबाट टेन्ट, सजावट र ईभेन्ट ब्यवसायीमा भाईचारा र समाजमा छुट्टै पहिचान बनेको दाबी गरे । सबै ब्यवसायीहरुको हातोमालो गर्दा हरेक कार्यक्रमहरु सफल भएको भन्दै वार्षिक कार्ययोजना अनुसार ब्यवसायीक हकहितसंगै समुदायमा सामाजिक गतिविधिमा संस्था अग्रसर रहेको बताए ।