खोज

नेपालगञ्ज, १४ वैशाख ।

पूर्व प्रधानमन्त्री एवं नेकपा मओवादी केन्द्रका अध्यक्ष पुष्पकमल दाहाल प्रचण्डले मओवादीलाई जनताले फेरि विश्वास गर्न थालेको बताएका छन् ।

निरंकुशतावादीको विरोधसँगै पार्टीले समाजवादको यात्रा तय गरेपछि सबैतिर माओवादीमय भएको प्रचण्डको दावी छ । आइतबार बाँकेको राप्ती सोनारी गाउँपालिका ६ फत्तेपुरमा आयोजित जनतासँग माओवादी तराई मधेश जागरण अभियान कार्यक्रमलाई सम्बोधन गर्दै अध्यक्ष प्रचण्डले समाजवाद यात्रामा जानको लागि पार्टीलाई फेरि एकपटक पुनर्निर्माण गर्ने, यथास्थितिबाट अर्को ठाउँमा लैजाने अभियानमा लागेको बताए ।

उनले भने, ‘विभिन्न जातीय मोर्चाहरुको सम्मेलन गर्दै आएका छौं, सम्मेलनमा मओवादीलाई जनताको सहभागिता, साथ र सहयोग बढ्दै गएको तपाई सबैले देखि नै रहनुभएको छ ।’ जतततै माओवादी मय र प्रचण्डमय बनेको देखेर फेरी नयाँ जिम्मेवारी थपेको महसुस भइरहेको बताउँदै उनले जनताको आशा र भरोसालाई अव खेर जान नदिने गरी देश डौडाहामा लागेको बताए । मओवादीले काँग्रेस र एमालेसँग समिकरण गरेर फाईदा जति काँग्रेस र एमालेले नै लिएको बताउँदै प्रचण्डले मओवादीलाई घाटा मात्र भएको जिकिर गरे ।

अव काँग्रेस र एमालेको बैशाखी नटेकीकन एक्लै हिँडेमा माओवादी सिद्धिन्छ भन्ने जनताको आरोप लागेपनि अहिले मओवादी एक्लै हिंड्दा जनाताले विश्वास गर्न थालेको बताए । उनले भने, ‘मओवादीलाई धेरै जनताले फेरि विश्वास गर्न थालेको उदाहरण उप निर्वाचन र पत्रकार महासंघ तथा विद्यार्थी संगठनको अधिवेशनबाट आएको परिणामबाट छर्लङ्ग छ ।’ सुशासन र भ्रष्टाचारको विरोध गरेकै कारण माओवादी सरकारबाट बाहिरिनुपरेको बताउँदै उनले प्रतिपक्षमा बसेर पनि भ्रष्टचारविरुद्ध निरन्तर आवाज उठाइरहेको बताए ।

उनले भने ‘सुशासन र भ्रष्टाचार विरोधी माहोलको लडाई लड्ने पार्टी माओवादी केन्द्र हो भन्ने जनताले जसरी महसुस गरेका छन् त्यसै अनुरुप हामी जनताको घर दैलोमा पुग्न सक्यौं भने २०८४ को निर्वाचनमा मओवादी एक नम्बर पार्टी बन्छ ।’

माओवादी केन्द्रले सञ्चालन गरेको तराई मधेश जागरण अभियान कार्यक्रमलाई सम्बोधन गर्नु अगाडि पूर्व प्रधानमन्त्री प्रचण्डले बाँकेको राप्ती नदीको कटानको स्थलगत निरीक्षण गरेका थिए । उनले राप्ती सोनारी ७ मा राप्ती नदीले गरेको कटान तथा तटबन्धको स्थलगत निरीक्षण गरेका हुन् ।

पूर्वमन्त्री माओवादी स्थायी समितिका सदस्य महेश्वर गहतराज अथक, पूर्व उपसभामुख पूर्णाकुमारी सुवेदी, पूर्व लुम्बिनी प्रदेशमन्त्री कृष्ण केसी नमुना र वडा नम्बर ७ का वडाध्यक्ष रामलखन थारूले राप्ती नदीले गर्दै आएको कटान, डुबान र तटबन्ध निर्माण नहुनुका बारेमा अध्यक्ष प्रचण्डसमक्ष जानकारी गराएका थिए ।

कटान तथा तटबन्धको निरीक्षण गर्दै अध्यक्ष प्रचण्डले तत्काल तटबन्धको काम पूरा गरेर सो क्षेत्रका जनतालाई डुबान र कटानको त्रासबाट जोगाउन निर्देशन दिए । उनले तत्काल हुनसक्ने क्षतिको न्युनीकरणका लागि उपलब्ध बजेटबाट काम अघि बढाउन तटबन्ध निर्माण आयोजना प्रमुखलाई निर्देशन दिँदै थप बजेटका लागि आफूले पनि पहल गर्ने प्रतिबद्धता जनाए । राप्ती सोनारी ७ मा राप्ती नदीमा तटबन्ध निर्माण नहुँदा राप्ती सोनारीको वडा नम्बर ७ फत्तेपुर र नरैनापुर क्षेत्र प्रभावित हुँदै आएको छ ।

तटबन्ध नहुँदा सो क्षेत्रका सात भन्दा बढी गाउँका सयौं जनता त्रसित छन् । पटकपटक सो तटबन्धको निर्माणका लागि स्थानीय बासिन्दाले माग गर्दै आएपनि सुनुवाइ नभएको वडा नम्बर ७ का वडा अध्यक्ष रामलखन थारूले बताए ।