खोज

बर्दघाट,१३ बैशाख । बर्दघाट खानेपानी तथा सरसफाइ उपभोक्ता सँस्थाको आयोजनामा १ दिने अभिमुखीकरण एवम् सचेतना कार्यक्रम सम्पन्न भएको छ ।
आयोजना क्षेत्र भित्रका आमा समुह लक्षित खानेपानी सुरक्षा योजना सम्बन्धि अभिमुखीकरण एवम् सचेतना कार्यक्रम सम्पन्न भएको हो । कार्यक्रममा रमाइलो आमा समुह र आनन्द नगर आमा समुहका करिव ४० जनाको सहभागिता रहेको थियो । मुहान देखी मुखसम्म शुद्ध पिउने पानी कसरी पुर्याउने र पानीलाइ किटाणु जिवाणु रहित बनाउन आवश्यक विधिहरुको बारेमा कार्यक्रममा प्रकाश पारिएको थियो ।
कार्यक्रममा बर्दघाट नगरपालिकाका नगर उप प्रमुख रुद्र प्रकाश उपाध्यायले सस्थाले बितरण गरेको पानी यस क्षेत्रमै गुणस्तरिय र बिस्वसनिय रहेको बताउदै सँस्थाद्वारा वितरित पानी घरमा सँग्रह गर्दा र प्रयोग गर्दा समेत गुणस्तर कायम राख्न गृहिणीहरुको प्रमुख भूमिका रहने बताए । उनले पानीजन्य रोगबाट बँच्न वितरित पानीको गुणस्तर कायम राख्नुपर्नेमा जोड दिएका थिए ।

कार्यक्रमलाइ सम्बोधन गर्दै सस्थाका अध्यक्ष दिपक लम्सालले खाने पानीसंग बिशेषगरि महिला प्रत्यक्ष जोडिएका कारण पनि यस सस्थाले आफ्ना क्षेत्राधिकार भित्रका महिलाहरुलाई पानीको महत्व र सुरक्षा सम्बन्धी सचेतनाको आवस्यकता महसुस गरिएको बताए ।

खानेपानी सुरक्षा योजना टोली सँयोजक एवम् सँस्थाका उपाध्यक्ष कमल थापाले नेपाल सरकारले तय गरेको मापदण्ड अनुसारको नियमित प्रयोगशाला परिक्षण पछि मात्र वितरण गरिएको पानी उपभोग गर्ने आफ्ना घरमा पानी राख्ने भाडाहरु सफा राख्न सबैलाई गरेका थिए ।

कार्यक्रममा सस्थाका ब्यवस्थापक बिष्णु भुषालले सस्थाको बिगत र बर्तमानको चित्रण गर्दै बिगतमा सस्थाले भोग्नु परेको समस्याहरु संग जुद्धै अहिलेको अवस्थामा आइपुगेको जानकारी गराउदै खानेपानीको सहि सदुपयोग गर्न सबैलाइ आग्रह गरेका थिए ।

सो कार्यक्रममा उपस्थित महिलाहरुले सस्थाका क्षेत्राधिकार भित्र ढल ब्यवस्थापन, सार्वजनिक स्थलमा सार्वजनिक शौचालय, सार्वजनिक स्थलमा थप निशुल्क पानीको ब्यवस्था गर्न सुझाव दिएका थिए ।