खोज

बुटवल, १३ वैशाख ।

लुम्बिनीमा आयोजित अन्तर्राष्ट्रिय सांस्कृतिक फेस्टिवल र सेमिनारको उद्घाटन समारोहमा जनमत पार्टीका नेता तथा लुम्बिनी प्रदेशका सांसद सिके गुप्ताले लुम्बिनी विकास कोषले पदाधिकारीहरूको सम्मान नगरेको आरोप लगाउँदै कार्यक्रम बहिष्कार गरी हलबाट बाहिरिएका छन् । प्रधानमन्त्री केपी शर्मा ओलीले शनिबार उद्घाटन गरेको कार्यक्रममा गुप्ताले आफू लगायत प्रदेशका मन्त्री र सांसदहरूको लागि कुर्सी व्यवस्था नभएको गुनासो गरे।

गुप्ताका अनुसार, मन्त्री भूमिश्वर ढकाल, मन्त्री प्रचण्ड विक्रम न्यौपाने र आफू लगायत प्रदेश सासंदहरूप्रति लुम्बिनी विकास कोषले अपमानजनक व्यवहार गरेकोले बाहिरिएको बताए । पूर्व सामाजिक विकास मन्त्रीसमेत रहेका गुप्ताले लुम्बिनी विकास कोषमाथि बारम्बार प्रदेश सरकार र स्थानीय जनप्रतिनिधिहरूप्रति बेवास्ता गरेको आरोप लगाए ।

सांसद गुप्ताले लुम्बिनी विकास कोषले संघीयताको मर्म विपरीत स्थानीय र प्रदेश सरकारको अपनत्व कमजोर बनाएको आरोपसमेत लगाए । उनले कार्यक्रमको व्यवस्थापन फितलो भएको, मुख्यमन्त्रीसम्मका लागि सुरुमै कुर्सीको व्यवस्था नभएको र पटक–पटक आग्रह गर्दा पनि बेवास्ता गरिएको बताए। गुप्ताले भने, “लुम्बिनीका स्थानीयले आफ्नो जग्गा दिएर विकास कोष स्थापना गरेका हुन्, तर कोषले स्थानीयलाई न सम्मान दिएको छ, न त अपनत्व। अब हामी स्थानीय सहयोगमा आफ्नो अधिकार स्थापित गर्ने संघर्ष सुरु गर्छौं।”

वैशाख १३ र १४ गते आयोजना गरिएको उक्त अन्तर्राष्ट्रिय कार्यक्रममा नेपाल र चीनबीचको सांस्कृतिक सम्बन्ध विस्तार गर्ने उद्देश्य रहेको छ। कार्यक्रम चीनको वल्र्ड एलायन्स फर बुद्धिष्ट कल्चरल एक्सचेन्ज लिमिटेड र वीचो पिस क्यालिग्राफी एण्ड पेन्टिङ एकेडेमीको सहकार्यमा, तथा नेपाल सरकारको संस्कृति, पर्यटन तथा नागरिक उड्डयन मन्त्रालय र लुम्बिनी विकास कोषको सहआयोजनामा सम्पन्न हुँदैछ।