खोज

नेपालगञ्ज, १२ बैशाख ।

लुम्बिनी कप अन्तर्राष्ट्रिय आमन्त्रण महिला फुटबल प्रतियोगिताको उपाधि विभागीय टोली सशस्त्र प्रहरीको एपीएफ क्लबले जितेको छ । अर्को विभागीय टोली नेपाल पुलिस क्लबलाई १–० गोल अन्तरले हराउँदै एपीएफले उपाधिमाथि कब्जा जमाएको हो ।

नेपालगन्ज रङ्गशालामा शुक्रबार भएको निकै कडा प्रतिस्पर्धात्मक फाइनल खेलमा एपीएफले पुलिसलाई अन्तिम समयमा स्तब्ध बनाएको हो । एपीएफका तर्फबाट अन्तिम मिनेटमा गीता रानाले एक मात्र निर्णायक गोल गरिन् । उनी नै प्लेयर अफ द म्याच भइन् । एपीएफले रौतहट फुटबल संघको टोली र पुलिसले त्रिभुवन आर्मी क्लबलाई पराजित गर्दै फाइनल यात्रा तय गरेका थिए ।

उपाधिसँगै एपीएफले ५ लाख ५ हजार ५ सय ५५ रुपैयाँ नगद पुरस्कार हात पार्दै ट्रफी उचालेको छ । उपविजेता बन्दै पुलिसले २ लाख ५० हजारमा चित्त बुझायो । प्रतियोगिताको उत्कृष्ट खेलाडी एपीएफकी कप्तान अनिता बस्नेत घोषित हुँदै नगद रु. २५ हजार प्राप्त गरिन् । प्रतियोगितामा उत्कृष्ट गोलकिपर पुलिसकी उषा नाथ, उत्कृष्ट डिफेन्डर एपीएफकी गीता राना, मिडफिल्डतर्फ एपीएफकै सरु लिम्बू, स्ट्राइकर एपीएफकी अनिता केसी र उत्कृष्ट प्रशिक्षक पनि एपीएफकै भगवती थापा घोषित भए । उनीहरूले जनही नगद रु १० हजार रुपैयाँ प्राप्त गरे ।

फाइनल खेललाई सम्बोधन गर्दै लुम्बिनी प्रदेशका सामाजिक विकास मन्त्री जन्मजय तिमिल्सेनाले खेल क्षेत्रले समाजको आमुल परिवर्तन गर्ने बताए । खेलले सभ्य समाजको निर्माण गर्ने बताउँदै उनले भने, ‘खेलले भूगोलको पहिचान बनाउने गर्छ तर, भोको पेटले खेल खेल्न नसकिने भएकाले लुम्बिनी प्रदेशबाट खेल क्षेत्रका लागि बजेट विनियोजनको तयारीमा रहेका छौं ।’ ूउनले लुम्बिनी कपले एक आपसमा आत्मीयता र सहयोगी भावना बढाउने बताए । प्रतियोगिता सुरु हुनु अगाडि बाके जिल्लाबाट प्रतिनिधित्व गर्दै विभागीय टिम नेपाल पुलिस क्लवको महिला फुटवल टोलीमा क्याप्टेनको भूमिका निभाइरहेकी निरु थापालाई सम्मान गरिएको थियो । बाँकेको जानकी गाउँपालिका वडा नम्बर १ शिवपुरी घर भएर देश तथा विदेशमा पहिचान बनाइसकेकी खेलाडी निरुलाई बाँके जिल्ला फुटबल संघले प्रमाणपत्र र नगद रु. २५ हजार सहित सम्मान गरेको हो ।

निरूलाई लुम्बिनी प्रदेशका सामाजिक विकास मन्त्री तिमिल्सिना, बाँके जिल्ला फुटबल संघका अध्यक्ष भोजराज शाही र अन्तरालका कार्यकारी जयनारायण शाह लगायतले सम्मान गरेका थिए ।

प्रतियोगितामा नेपाल र भारतका गरेर ८ वटा टिमको सहभागिता थियो । घरेलु टिम बाँके–११, सशस्त्र प्रहरी बलको एपीएफ, नेपाल पुलिस क्लब, त्रिभुवन आर्मी क्लब, कर्णाली एफसी, सुदूरपश्चिम एफसी, सिलिगुडी फुटबल क्लब, र रौतहट जिल्ला फुटबल संघ टिमको सहभागिता थियो । बाँके जिल्ला फुटबल सङ्घसँगको सहकार्यमा अन्तरालले आयोजना गरेको प्रतियोगिता वैशाख ५ गतेदेखि सुरु भएको थियो ।