खोज

बुटवल, १२ बैशाख । भिन्धो नेवाः समाजको तेस्रो साधारण सभा तथा दोस्रो अधिवेसन एवं भिमसेन मन्दिर शिलान्यास कार्यक्रम सम्पन्न भएको छ । समाजसेवी अनुपमान सैजुबाट दानमा प्राप्त जग्गामा समाजले भिमसेन मन्दिरको पुर्वाधार निर्माण गर्न लागेको हो ।

एक समारोहका बिच बुटवल उपमहानगरपालिकाका नगरप्रमुख खेलराज पाण्डेयले विधिवत पुजाआजासहित मन्दिरको शिलान्यास गर्दै भावि पुस्तालाई आफ्नो कला, संस्कृति बुझाउन पनि यसको संरक्षण आजको आवश्यकता भएको बताए । विभिन्न जातजाती, कला, संस्कृति जगेर्ना र संरक्षणमा नगरबाट अभियान चलाएको उनले बताए ।

कार्यक्रममा संस्थाकी अध्यक्ष पारु श्रेष्ठले भिमसेन देवता नेवारी समुदायका महत्वपूर्ण आराध्य देवता भएको उल्लेख गर्दै, यस मन्दिर निर्माणमार्फत संस्कृति संरक्षणको अभियानलाई अगाडि बढाइएको बताइन् । बुटवल उपहानगरपालिका वडा न १७ मा २ कठ्ठा २ धुर क्षेत्रफलमा भिन्धो नेवाः समाजको सामाजिक भवन समेत निमार्ण हुने उनले बताए ।

कार्यक्रममा बुटवल उपमहानगरपालिका वडा नं १७ का ज्ञान बहादुर रेश्मी, वडा १९ का जनप्रतिनिधि लक्ष्मी थारु, नेवा देय दबु लुम्बिनी प्रदेशका अध्यक्ष बाबुराम श्रेष्ठ, नेवा देय दबु रुपन्देही जिल्ला अध्यक्ष चन्द्र प्रकाश श्रेष्ठ, रुपन्देही जिल्लाका उपाध्यक्ष अरुणा श्रेष्ठ, नगरअध्यक्ष सुन्दर श्रेष्ठ, भिमसेन समाजका अध्यक्ष सहदेव श्रेष्ठ, ईन्जिनियर सुमन श्रेष्ठ, नेवा सेवा समितिका अध्यक्ष डिल्लि प्रसाद श्रेष्ठ, गणेश नेवा समाजका अध्यक्ष ओम प्रकाश श्रेष्ठ, संस्थाका सचिव भुमलाल श्रेष्ठले सबै जातजाती र धर्मसंस्कृतिको महत्वबारे प्रकाश पार्दै देशको पहिचान दिने काम यसैबाट भएको बताए ।

कार्यक्रममा संस्थाका संरक्षक गोपाल श्रेष्ठले नेवार संस्कृतिको धरोहर र आस्थाको केन्द्रका रुपमा भिमसेन मन्दिर निर्माण हुन लागेको बताए । पुर्खाहरुले आर्जेको कला, संस्कृतिलाई संरक्षण हुने र स्थानिय सरकारसंग सहकार्यको पहललाई चिनाउने उनले बताए । कुल २५ लाख रुपैया बराबरको लागतमा निर्माण हुने मन्दिरमा पालिकाबाट आर्थिक सहयोग भएको छ ।

यसैबिच भिन्धो नेवाः समाजको तेस्रो साधारण सभा तथा दोस्रो अधिवेसनबाट पुनः पारु श्रेष्ठको अध्यक्षतामा नया ११ सदस्यीय नया कार्यसमिति सर्वसम्मत चयन भएका छन । जसको उपाध्यक्ष सन्ध्या श्रेष्ठ, सचिव भुमलाल श्रेष्ठ, सहसचिव नोमकला श्रेष्ठ, कोषाध्यक्ष पुनम श्रेष्ठ तथा सदस्यहरु निरु श्रेष्ठ, सृजाना श्रेष्ठ, अन्जु श्रेष्ठ, योगराज श्रेष्ठ, मान बहादुर श्रेष्ठ रहेका छन ।