खोज

भारतको जम्मु–कश्मीरको पहलगाममा भएको आतङ्कवादी आक्रमणपछि भारतीय क्रिकेट कन्ट्रोल बोर्डले पाकिस्तानसँग कुनै पनि द्विपक्षीय क्रिकेट शृङ्खला नखेल्ने स्पष्ट संकेत दिएको छ।

बीसीसीआईका उपाध्यक्ष राजीव शुक्लाले भारतीय सञ्चारमाध्यमसँग कुरा गर्दै भारत सरकारले लिएको अडान अनुसार पाकिस्तानसँग अब कुनै पनि प्रकारको द्विपक्षीय खेल नहुने बताएका हुन्। “हामी पीडितसँग छौँ,” शुक्लाले भने, “सरकारको नीति अनुसार पाकिस्तानसँग द्विपक्षीय खेल नखेल्ने कुरा स्पष्ट छ।”

यद्यपि उनले अन्तर्राष्ट्रिय क्रिकेट परिषदको आयोजनामा हुने प्रतियोगिताहरूमा भने भारतले पाकिस्तानसँग खेल्नुपर्ने सम्भावना रहेको बताएका छन्। “आईसीसीलाई पहलगाम हमलाबारे थाहा छ, निर्णय उसैले गर्नेछ,” शुक्लाले बताए।

भारत र पाकिस्तानबीच अन्तिमपटक २०१२–१३ मा सीमित ओभरको द्विपक्षीय क्रिकेट शृङ्खला भएको थियो, जहाँ पाकिस्तानले भारत भ्रमण गरेको थियो। त्यसयता दुबै देशबीचको क्रिकेट सम्बन्ध लगातार बिग्रँदै गएको छ। भारत पछिल्लो पटक २००८ को एशिया कप खेल्न पाकिस्तान गएको थियो, तर द्विपक्षीय भ्रमण सन् २००५–०६ पछि भएको छैन।

मंगलबार पहलगाममा पर्यटकमाथि भएको आतंकवादी हमलामा एक नेपाली नागरिकसहित कम्तीमा २६ जनाको मृत्यु भएको थियो, जसले भारतमा जनआक्रोश चुल्याएको छ। यसै घटनाले भारत–पाकिस्तानबीचको खेलकुद सम्बन्धमा फेरि एकपटक गम्भीर असर पुर्‍याएको देखिएको छ।