खोज

काठमाडौं ।

लगातार चार दिनसम्म ओरालो लागेको नेप्से परिसूचक साताको अन्तिम दिन बिहीबार सामान्य सुधारसहित उकालो लागेको छ। नेप्से २.०८ अङ्कले बढेर २६५८.०२ विन्दुमा पुगेको हो। यसदिन सेन्सेटिभ इण्डेक्स १.२३ अङ्क, फ्लोट इण्डेक्स ०.२२ अङ्क र सेन्सेटिभ फ्लोट इण्डेक्स ०.५३ अङ्कले वृद्धि भएको छ।

बिहीबार ३०८ कम्पनीका १ करोड ९७ लाख ५४ हजार कित्ता शेयर कारोबार भए, जसको कुल कारोबार रकम ७ अर्ब ८७ करोड ९३ लाख रुपैयाँ पुगेको छ। यसअघि बुधबारको कारोबार रकम ७ अर्ब ५७ करोड रुपैयाँ रहेको थियो।

१३ वटा उपसमूहमध्ये ५ उपसमूहको परिसूचकमा वृद्धि देखिएको छ। लगानी उपसमूह सबैभन्दा बढी २.२९ प्रतिशतले उकालो लागेको हो। व्यापार, बैंकिङ, जलविद्युत् र म्युचुअल फण्डका परिसूचकमा पनि सामान्य सुधार देखिएको छ।

तर, होटल तथा पर्यटन उपसमूह १.१६ प्रतिशतले घट्दा अन्य केही उपसमूहमा पनि ओरालो लागेको छ। बिहीबार नेपाल माइक्रो इन्स्योरेन्स र क्रेष्ट माइक्रो लाइफ इन्स्योरेन्सका शेयर सकारात्मक सर्किट लेभलमा कारोबार भएका छन्।

यता, नेपाल हाइड्रो डेभलोपर्सको शेयर मूल्य भने ७.१२ प्रतिशतले घटेको छ। कारोबार रकमका आधारमा ङादी ग्रुप पावर कम्पनी अग्रपंक्तिमा देखिएको छ, जसको कारोबार ७० करोड ३४ लाख रुपैयाँभन्दा बढी पुगेको छ।

साताको अन्तिम दिन बजारको सामान्य सुधारले लगानीकर्तालाई सास फेर्ने मौका दिएको छ, यद्यपि समग्र बजार अझै अस्थिर स्थितिमा देखिएको विश्लेषकहरू बताउँछन्।