खोज

गुल्मी,१० वैशाख।
राज्यले लाखौँ रुपियाँ खर्चेर बनाएका सरकारी सम्पतीको संरक्षण हुन सकेको छैन् । सदरमुकाम तम्घासको मुटुमै रहेको थ्रिडी पार्क वषौँदेखी प्रयोगविहीन छ । यसलाई प्रयोगमा ल्याउन र संरक्षण गर्नमा सरोकारवाला निकायले कुनै चासो नै देखाएका छैनन् । उल्टै देखेको नदेख्यै जस्तो गरेर आँखा चिम्लने गरेको पाइएको छ । जिल्ला प्रशासन कार्यालय गुल्मी र जिल्ला समन्वय समिति गुल्मीको अगाडि रहेको पार्क प्रयोगविहीन हुँदासमेत स्थानीय सरकार र सरोकारवालाको ध्यान जान नसकेकोमा यहाँका स्थानीयहरुले दुःख ब्यक्त गरेका छन् ।

रेसुंगा नगरपालिका र लुम्बिनी प्रदेश सरकारको ५०-५० प्रतिशत साझेदारीमा ५५ लाखको लागतमा पार्क निर्माण भएको लामो समयदेखी प्रयोगविहीन अवस्थामा छ । ५५ लाखको निर्माण पश्चात रेसुङगा नगरपालिकाले विभिन्न समयमा गरी १० लाख भन्दा बढी रकम मर्मतमा खचिएको छ । ६५ लाख बढी खर्चिएको पार्कका केही संरचना पनि भाँचिएका छन् भने पार्कमा सडक बालबालिकाले रजाइँ गर्ने गरेका छन् ।

नागरिक समाज गुल्मीका अध्यक्ष पदमप्रसाद पाण्डेले थ्रिडी पार्क निर्माण गरेर राज्यको रकम दुरुपयोग भएको बताएका छन् । नागरिकले सरकारलाई खवरदारी गर्ने पहिलेको लाँकुरी मञ्चलाई हटाएर निर्माण गरिएको संरचनाले राज्यको रकम दुरुपयोग हुनु र सञ्चालनमा नआउनु दुःखद भएको बताए । रेसुंगा नगरपालिकाका सूचना प्रविधि अधिकृत सुरेश खनालले थ्रिडी पार्कलाई निजी क्षेत्रलाई सञ्चालनका लागि दिने गरी ब्यबस्था गरिएको बताएका छन् । योजना बनाए पनि कार्यन्वयनमा भने आउन नसकेको उनको भनाइ छ ।