खोज

चन्द्रौटा, १० बैशाख ।
जिल्ला ट्राफिक प्रहरी कार्यालय कपिलवस्तुले एक करोड बढी राजस्व संकलन गरेको छ । चाल आर्थिक बर्ष २०८१/०८२ को चैत मसान्तसम्म १ करोड १४ लाख ५५ हजार ५ सय राजस्व संकलन गरेको हो । ट्राफिक नियम उल्लघंन गरेका १० हजार ७ सय ८८ सवारी साधन कारवाहीबापत राजस्व संकलन गरेको ट्राफिक प्रहरी निरीक्षक पंकज चुदालीले जानकारी दिए ।

सवारी कारवाही भएका मध्ये सबैभन्दा बढी ट्रक रहेका छन् । ट्रक मात्र ४ हजार ७३ वटा कारवाहीमा परेका छन् । भने दोस्रोमा मोटरसाईकल ३ हजार १ सय ३२ वटा कारवाहीमा परेका छन् । जीप, कार र भ्यान २ हजार २ सय ७१ वटा कारवाहीमा परेका छन् । त्यसैगरीे बस ७ सय १० वटा रहेका छन् । भने ट्रेक्टर ३ सय २१ र अटोरिक्सा २ सय ८१ वटा गरि कूल १० हजार ७ सय ८८ सवारी साधन कारवाहीमा परेकोे प्रहरी निरीक्षक चुदालीले बताए । दिनप्रतिदिन सवारी साधनको चाप बढ्दै गएकोले ९ महिनामै ट्राफिक नियम उलंघन बढी भएको हँदा राजस्व बढ्दै गएको छ ।

दुर्घटना न्यूनीकरण गर्न पछिल्लो समय ट्राफिक प्रहरीको सक्रिया बढेको प्रहरीको दावी छ । यस्तै २ सय ६३ भएको सवारी दुर्घटनामा ५२ जनाको मृत्यु भएको छ । भने ४ सय ७ जना घाईते भएको जिल्ला ट्राफिक प्रहरी कार्यालय कपिलवस्तुको तथ्यांकमा उल्लेख छ । ट्राफिक प्रहरीले चालकका लागि चेतनामूलक अभियान सञ्चालन गर्दै आएको छ । दुर्घटना न्यूनीकरण गर्नका लागि सडक, विद्यालय जस्ता सार्वजनिक स्थलहरूमा ट्राफिक सचेतनामूलक कार्यक्रम गर्दै आएको जनाइएको छ ।

अभियानमा कपिलवस्तु जिल्लाको विभिन्न स्थानहरूमा गरी १ हजार ४ सय ५९ वटा कार्यक्रम गरिएको उनले बताए । उनका अनुसार कार्यक्रममा ५३ हजार २ सय २७ जना सवारी चालकहरूसँगै आम सर्वसाधारण समेत लाभाम्वित भएका छन् । “जरिवाना मात्रै गर्दैनौँ, चालकबाट नियम उलङ्घन नहोस् भनेर चेतनामूलक अभियानसमेत सञ्चालन गर्दै आएका छौँ ।”: जिल्ला ट्राफिक प्रहरी कार्यालय कपिलवस्तु गोरुसिंगेका निरीक्षक चुदालीले भने । सवारी साधनका आ–आफ्ना समिति तथा नीति नियम रहेकाले सवारीले नियम उलङ्घन गरे उनीहरूले दोहोरो जरिवाना तिर्नुपर्ने व्यवस्था रहेको छ ।
ट्राफिक नियम उलङ्घन गरी सार्वजनिक यातायातमा सिटभन्दा बढी यात्रु बोक्नु, कागजात नवीकरण नगरेको, हेल्मेट प्रयोग नगरेको, ओभरलोड र मापदण्ड विपरीत कार्य गरेको सवारीलाई कारवाही गरि राजस्व संकलन गरिएको जिल्ला ट्राफिक प्रहरी कार्यालय कपिलवस्तुले जनाएको छ ।