खोज

नेपालगञ्ज, ९ वैशाख ।

भेरी अस्पताल नेपालगञ्जमा मंगलबारदेखि मृगौला प्रत्यारोपण सेवा सुरु भएको छ । मृगौला पीडित ४० र ३७ वर्षका दुई जना पुरुषको मृगौला प्रत्यारोपण गरेर सेवा सुरु गरिएको हो । यो सँगै भेरी अस्पताल मृगौला प्रत्यारोपण गर्ने लुम्बिनी प्रदेशकै पहिलो अस्पताल भएको छ ।

अस्पतालका प्रमुख मेडिकल सुपरिटेण्डेन्ट डा. निराजन सुवेदीका अनुसार मिर्गौला प्रत्यारोपण गर्नका लागि सहिद धर्मभक्त माथेमा मानव अंग प्रत्यारोपण केन्द्रका निर्देशक डा. पुकारचन्द्र श्रेष्ठसहित १४ जनाको टिम नेपालगन्ज आएको छ । उक्त टिमले दुई जना बिरामीको मृगौला प्रत्यारोपण गरेर सेवा सुरु गरेको हो ।

मेसु डा. सुवेदीले सेवा सुरु भएसँगै अब महिनामा एकजना बिरामीको मृगौला प्रत्यारोपण गरिने बताए । ‘भेरी अस्पतालमा मृगौला प्रत्यारोपण सेवा सुरु भइसकेको छ, अब यो सेवा निरन्तर चल्छ, केही समयसम्म महिनामा एक पटक मृगौला प्रत्यारोपण गर्ने योजना बनाएका छौं,’ उनले भने ‘यो सेवालाई निरन्तरता दिनको लागि स्रोत साधन पनि खर्च हुन्छ ।’ अस्पतालमा हाल मृगौला प्रत्यारोपन गर्नका लागि यूरोलोजी विशेषज्ञ, डा. दिपेश गुप्ताले लाइसेन्स (अनुमति) प्राप्त गरिसकेका छन् । उनीसहित अन्य विशेषज्ञ चिकित्सकहरु पनि अस्पतालमा कार्यरत छन् ।

अस्पताल विकास समितिका अध्यक्ष वीरेन्द्रबहादुर शाहले मृगौला प्रत्यारोपण सेवाले भेरी अस्पतालको उचाई झनै बढाएको बताए । ‘मृगौला प्रत्यारोपण सेवाले अस्पतालको उचाई थपेको छ,’ उनले भने ‘अझैपनि अस्पतालमा सेवा थपिदै जानेछन् ।’ भेरी अस्पतालमा हाल कार्डियोलोजी, नेफ्रोलोजी, हेमोडाइलाईसिस, हेमाटोलोजी, युरोलोजी, ग्यास्ट्रो सर्जरी, स्पाईन सर्जरी, अर्थोस्कोपिक सर्जरी, आईसियु, एनआईसियु सेवालगायतबाट विशिष्टकृत सेवा दिइरहेको अस्पतालले जनाएको छ ।