काठमाडौँ ।
मङ्गलबार पनि नेपाली सेयर बजारमा गिरावट देखिएको छ। नेप्से परिसूचक ९.९६ अंक घट्दै २६८८.३२ विन्दुमा थामिएको छ, जससँगै सेन्सेटिभ इन्डेक्स पनि ३.९१ अंकले ओरालो लागेको छ। फ्लोट इन्डेक्स र सेन्सेटिभ फ्लोट इन्डेक्स क्रमशः ०.८६ र १.२९ अंकले घटेका छन्। बजारमा कारोबार भएका ३१९ कम्पनीका २ करोड २५ लाख कित्ता शेयर किनबेच हुँदा कुल कारोबार रकम ८ अर्ब ३२ करोड रुपैयाँ पुगेको छ, जुन अघिल्लो दिनको ८ अर्ब ७७ करोडको तुलनामा कम हो।
आज १३ उपसमूहमध्ये ‘अन्य’, ‘उत्पादन तथा प्रशोधन’ र ‘होटल तथा पर्यटन’ समूह मात्रै हरियालीमा देखिए भने बाँकी १० उपसमूहमा गिरावट आयो। ‘अन्य’ समूह २.२१ प्रतिशतले बढ्दै अग्रस्थानमा रह्यो, जहाँ नेपाल पुनर्बीमा र हिमालयन रिइन्स्योरेन्सको योगदान महत्वपूर्ण देखियो। उत्पादन समूह पनि १ प्रतिशतभन्दा बढीले बढ्यो।
आजको विशेष आकर्षण बने दुई बीमा कम्पनी—नेपाल माइक्रो इन्स्योरेन्स र क्रेष्ट माइक्रोलाइफ इन्स्योरेन्स—जुन सकारात्मक सर्किट लेभलमा कारोबार भए। उता, मकर जितुमाया सुरी हाइड्रोपावरको शेयर साढे ७ प्रतिशतले उकालो लाग्दा कर्पोरेट डेभलपमेन्ट बैंकको शेयर मूल्य १० प्रतिशतले घट्दै सबैभन्दा धेरै गिरावटमा रह्यो।
कारोबार रकमका हिसाबले ङादी ग्रुप पावर कम्पनी अग्रस्थानमा रह्यो, जसको ४४ करोड ६० लाख रुपैयाँ बराबरको शेयर कारोबार भएको थियो। बजार लगातार ओरालो लागिरहेका बेला सीमित समूह र कम्पनीले मात्रै सकारात्मक संकेत देखाएका छन्।
